اقش-تىڭ ۋكرايناعا وزىق سوعىس قارۋلارىن ساتۋى ماسكەۋدى الاڭداتتى

اقش قورعانىس تاراۋلارى مەن سىرتقى ىستەر مينيسترلىگىنىڭ مالىمەتىندە، ۋكرايناعا وزىق سوعىس قارۋلارىن ساتىپ بەرەتىندەرىن جاريالاعان بولاتىن. بۇل ماسكەۋدىڭ مازاسىن كەتىردى. اپتا سوڭىندا جاساعان مالىمدەمەدە رەسەي جاق اقش-قا بۇل قادامعا بارماۋعا شاقىرىپ، ەسكەرتۋ جاسادى. بۇل تۋرالى «People» باسىلىمىنىڭ رەسمي سايتى جازدى.

قۇراما شتات ۇكىمەتىنىڭ مالىمدەمەسىندە ۋكراينانىڭ شەكارا قاۋىپسىزدىگىن قورعاۋىنا، ەگەمەندىگىن ساقتاپ، ۇزاق مەرزىمدىك قورعانىس قۋاتىن بەكەمدەۋىنە، سونىمەن قاتار ىقتيمال سوعىس جاعدايىنا قارسى تۇرا الۋىنا قولداۋ كورسەتۋ ءۇشىن وزىق ءارى قورعانىس قابىلەتى جوعارى قارۋ-جاراق ساتىپ بەرەتىنىن جازعان.

مەديا تاراۋلارىنىڭ كورسەتكەن مالىمەتىندە اقش-تىڭ ۋكرايناعا ساتىپ بەرەتىن قارۋلارىنىڭ اراسىندا 210 دانا تانككە قارسى زىمىران مەن 35 زىمىران قۇرىلعىسىنىڭ بار ەكەنى ءمالىم بولدى. اتالعان ماڭىزدى سوعىس تەحنيكالارىن قامتىعان ساۋدانىڭ قۇنى 47 ملن اقش دوللارى شاماسىندا.

قۇراما شتاتتىڭ بۇل شەشىمى رەسەيدىڭ كۇشتى نارازىلىعىن تۋدىردى، ءارى ماسكەۋ جاق اقش-قا ەسكەرتۋ جاسادى. رەسەي ۇكىمەتى رەسمي وكىلدەرىنىڭ ءبىرى: «اقش-تىڭ بۇل قادامى كيەۆكە قاراستى قارۋلى كۇشتەردىڭ ۋكراينا شىعىسىندا سوعىس تۋدىرۋىنا سەبەپ بولادى»، – دەدى. ماسكەۋدىڭ باعالاۋىنشا، اقش-تىڭ ۋكرايناعا باعىتتاعان شەشىمى ءوڭىردىڭ بەيبىتشىلىگىن ءبۇلدىرۋ بولىپ سانالادى.

“The Qazaq Times”