الەكساندر ۆينوكۋروۆ سوتقا تارتىلادى

وليمپيادا چەمپيونى الەكساندر ۆينوكۋروۆ ءوز قارسىلاسىنا اقشا بەرىپ، ونىڭ جەڭىلىسىن ساتىپ العان دەگەن ايىپپەن بەلگيا سوتىنىڭ الدىندا جاۋاپقا تارتىلاتىن بولدى. 2012 جىلى لوندون وليمپياداسىندا قازاقستانعا التىن مەدال سىيلاعان 44 جاستاعى سپورتشىعا «رەسەيلىك الەكساندر كولوبنەۆقا 2010 جىلى وتكەن لەج-باستون-لەج ءبىر كۇندىك ۆەلوجارىستا جەڭىلۋى ءۇشىن 150 مىڭ ەۋرو كولەمىندە پارا بەرگەن» دەگەن كىنا ارتىلىپ وتىر. بۇل تۋرالى AFP اقپاراتتىق اگەنتتىگى جازدى. 

بەلگيا پروكۋرورى الەكساندر ۆينوكۋروۆتىڭ سوتى 2018 جىلدىڭ 13 نارۋىزىندا بولاتىنىن حابارلادى. ونىمەن بىرگە قارسىلاسىنان كوپ كولەمدە اقشا الدى دەگەن ايىپپەن الەكساندر كولوبنەۆ تا سوتقا بارادى. تەرگەۋ ءىسىنىڭ باستالۋىنا قوس سپورتشىنىڭ بانكتەگى ەسەپشوتتارى اراسىندا 2010 جىلدىڭ شىلدە جانە جەلتوقسان ايلارىندا اۋەلى 50 مىڭ، كەيىننەن 100 مىڭ ەۋرو اۋدارىلعانى تۋرالى اقپارات نەگىز بولىپ وتىر.

“The Qazaq Times”