مۇستافا وزتۇرىك «قازاقتىڭ بريۋس ءليى» ەمەس

مۇستافا وزتۇرىك — شىعىس جەكپە-جەك ونەرىن جەتىك مەڭگەرگەن جاي عانا سپورتشى ەمەس. ول تۇماندى، قارابارقىن الەمگە جىبەرىلگەن جارىق جۇلدىز سەكىلدى ەدى. ول شيە بورىلەر مەن قاندەندەر، تۇلكىدەن ازعان قارساقتار قاپتاعان دالاعا ناعىز كوكبورى رۋحىن الىپ جەتكەن كوكجال بولاتىن.

ونىڭ اتالارى ادىلەتسىزدىك پەن قورلاۋعا توزبەگەن، ءور نامىسى مەن اسقاق كەۋدەسىن جاۋلارىنا باستىرعىسى كەلمەگەن ناعىز دالا قىراندارى بولاتىن. ەسەلەسكەن دۇشپانعا باس يمەيتىن، قويداي قايىرىپ، قوراعا كۇرگەيلەۋگە كونبەيتىن ءتۇز تارپاڭدارى ەرلىك تۋىن جىققان جوق. جاۋلارىمەن اتىستى دا شابىستى، بىراق العان بەتىنەن قايتپادى. الىپ ءشول تاكلاماكاندى باسىپ، اسپانمەن تىلدەسكەن گيمالايدى اسىپ، اقىرى انادولىعا جەتتى. سول باتىر ەلدىڭ، قايسار قازاقتىڭ تازا قاندى ۇلدارىنىڭ ءبىرى مۇستافا كابەيۇلى وزتۇرىك بولاتىن.

شوقتاي جانعان جانارىنان كوكبورىنىڭ رۋحى لاۋلاپ، ايناداي جان-دۇنيەسى جارقىراپ تۇراتىن. باتىرعا بىتكەن مىسى، اسىلعا بىتكەن مىنەزى ءتاڭىر ەرەكشە جاراتقان بولمىسى ناعىز نويان ەدى.
ەلىم، جەرىم، ۇلتىم، قازاعىم دەگەن ءسوزدى ول جان-تانىمەن بەرىلىپ ايتتى. قازاعىم دەگەن ۇلدىڭ جۇرەگى اپپاق، نيەتى كىرشىكسىز تازا ەدى، بىراق ونى قاسكويلەر قىزىل قانعا بويادى. تازقارالار مەن قۇزعىندار جايلاعان اسپاندا، بيىككە قانات قاققان قىراننىڭ توپشىسىن قيىپ، ومىرتقاسىن ءۇزدى. ءتۇبى مۇستافاداي ەرگە جاسالعان قاستاندىق، اياۋسىز قاسكويلىكتىڭ ارتى اشىلماي قويماس. ويتكەنى، قان قارىزى، حالقى سۇيگەن بەيۋاز ۇلدىڭ وبالى ەشكىمدى جىبەرە قويماس.

قازاقتىڭ قايسار ۇلى.

وعان دەگەن ەل-جۇرتتىڭ پەيىلى قانداي ەدى. حالىق شىن ىقىلاس-نيەتىمەن، ماحابباتىمەن بيىككە كوتەرگەن مۇستافا تاۋەلسىزدىكتى جاڭا الىپ، قۇلدىقتىن قۇرساۋىنان ەندى بوساعان ەلدىڭ ەڭسەسىن كوتەرۋگە، رۋحىن ورلەتىپ، نامىس تۋىن جەلبىرەتۋگە كەلگەن جەبەۋشى، سانانى بۇعاۋلاعان تەمىر شىنجىردى تۋراۋعا جىبەرگەن ءتاڭىردىڭ الداسپان قىلىشىنداي ەدى. ءيا، ونىمەن كەزدەسكەن، ءتالىمىن الىپ، ونەرىن ۇيرەنگەن، ءسوزىن تىڭداپ، ءجۇزىن كورگەن جاننىڭ ءبارى سونى اڭعاردى، سەزىندى. سول سەزىم ءالى دە حالىقتىڭ جۇرەگىندە. ءتىرى بولسا الاشتىڭ ايتوبەل باتىرى الپىسقا تولار ەدى… امال نە؟! ونىڭ رۋحى دارىعان، قاسيەتى قونعان ۇلدارىمىز امان بولسىن!

ايتپاقشى، ايگىلى اكتەر، جەكپە-جەك ونەرىنىڭ شەبەرى بريۋس ءليدىڭ كينوسىن كوپ كورگەندەر مۇستافا وزتۇرىكتەي ءدۇلدۇل ۇلدى «قازاقتىڭ بريۋس ءليى» دەيدى ەكەن. ءوزىمىزدى وزگەلەردىڭ شەگىنەن اسىرا المايتىن موجانتوپايلىقتان باسقا تۇك تە ەمەس بۇل. ءيا، بريۋس لي دە ايتۋلى تۇلعا. بىراق، ءارتىس سپورتشىنى مۇستافاداي باتىرمەن، بولمىسى دارا، قىران مىنەز، كوكجال رۋحتى ناعىز كوكتۇرىكتىڭ ۇرپاعىمەن تەڭەستىرۋ تىم تايىزدىق بولار ەدى. بىرگە ونەر ۇيرەنگەن، قاسىندا بولعان بريۋس ءليدىڭ قاتارداعى ادام ەكەنىن مۇستافا باتىردىڭ ءوزى دە ايتىپ كەتكەن. كەمسىتۋ دە، كورە الماۋ دا، تومەن ساناۋ دا ەمەس، شىنايى پىكىر، قالىپتى كوزقاراس.
سوندىقتان، مۇستافا وزتۇرىك قازاقتىڭ بريۋس ءليى ەمەس، ول – قازاقتىڭ مۇستافا وزتۇرىگى، ۇلتىنىڭ وعلانى، ەلىنىڭ ناعىز ەڭىرەپ تۋعان ەرى. جاتقان جەرىڭ جايلى بولىپ، رۋحىڭ اسپاندا شالقىسىن، اسىل اعا!

“The Qazaq Times”

(ماقالا 2014 جىلى qiyan.kz. bnews.kz سايتتارىندا جاريالانعان. بۇگىنگى ديماشتىڭ ءوزىن ۆيتاسقا تەڭەگەندەرگە ايتقان جاۋابىنا وراي، ۇندەس تاقىرىپتى وقىرمان نازارىنا قايتا ۇسىندىق-رەداكتسيا)