رەسەي ءىرى مۇناي ءوندىرۋشى جانە ەكسپورتتاۋشى ەل سانالادى. فوتو: Sputnik International.

رەسەي فەدەراتسياسىنىڭ كەدەن قىزمەتى 11 جەلتوقساندا تاراتقان مالىمەتتەرگە قاراعاندا، اعىمداعى جىلدىڭ العاشقى 10 ايىندا رەسەيلىك مۇناي ەكسپورتى وتكەن جىلدىڭ ۇقساس كەزەڭىمەن سالىستىرعاندا شامامەن 30% -عا ارتقان. بۇل تۋرالى «People» باسىلىمىنىڭ رەسمي سايتى حابارلادى.

اتالعان مالىمەتكە سەنسەك، 2017 جىلدىڭ الدىنعى 10 ايىندا رەسەيدىڭ مۇناي ەكسپورتى 76,93 ملرد. اقش دوللارىن قۇراعان. 2016 جىلى بۇل كورسەتكىش 59,66 ملرد. اقش دوللارى بولعان. وسى مەزگىلدەردە رەسەيدىڭ ەكسپورتتاعان مۇناي كولەمى 214 ملن تونناعا جەتىپ، وتكەن جىلدىڭ الدىنعى ون ايىنان 0,5 پايىزعا ارتقان.

اتالعان مەرزىمدە رەسەيدىڭ الىس شەتەلدەرگە ەكسپورتتاعان مۇناي كولەمى جالپى ەكسپورتتىڭ باسىم بولەگىن يەلەيدى. ياعني، الىس شەتەلدەرگە 199 ملن توننا مۇناي شىعارىپ، ونىڭ قۇنى 72,73 ملرد. اقش دوللارىنا تۋرا كەلگەن. تمد ەلدەرىنە ەكسپورتتاعان مۇناي كولەمى 15 ملن توننا بولىپ، بۇدان رەسەي قالتاسىنا 4,2 ملرد اقش دوللارى قۇيىلعان.

رەسەي الەمدەگى ءىرى مۇناي ءوندىرۋشى جانە ەكسپورتتاۋشى ەلدەردىڭ ءبىرى. 2016 جىلعى كورسەتكىشتە رف جالپى كولەمى 547 ميلليون توننا مۇناي ءوندىرىپ، ونىڭ 254 ميلليون تونناسىن شەتەلگە  ساتقان.

“The Qazaq Times”