الەمنىڭ ءار بولىگىندەگى مۇسىلماندار پالەستينانى قولداپ، نارازىلىق شەرۋىنە شىقتى

جۇما كۇنى اراب ەلدەرىندەگى مۇسىلماندار اقش پرەزيدەنتى دونالد ترامپتىڭ يەرۋساليمدى ءيزرايلدىڭ استاناسى دەپ مويىنداعان شەشىمىنە قارسى نارازىلىق شەرۋىنە  شىقتى. تۇركيا، ەۋرووداق پەن رەسەي تاياۋ شىعىستىڭ بەيبىتشىلىگىنىڭ بۇزىلۋ قاۋپىنە الاڭداپ، اقش-تىڭ شەشىمىن قاتاڭ سىنادى. بۇل تۋرالى ۆۆس اقپاراتتىق اگەنتتىگى جازدى. 

مەككە مەن مەدينە قالاسىنان كەيىن قاسيەتتى ورىن سانالاتىن ءال-اقسا مەشىتى شىعىس يەرۋساليمدە ورنالاسقان. قالا كوشەلەرىندە ء"بىز سەن ءۇشىن جانىمىزدى قۇربان ەتۋگە دايىنبىز، ءال-اقسا!" دەپ ۇرانداتقان مۇسىلماندار يزرايل مەن اقش-تىڭ تۋلارىن ورتەگەن. يزرايلمەن بەيبىت كەلىسىم ورناتقان ەكى اراب مەملەكەتىنىڭ ءبىرى يوردانيادا "يەرۋساليم-پالەستينانىڭ استاناسى" دەگەن پلاكاتتار ۇستاپ، قارسىلىق شەرۋىنە قاتىسقانداردىڭ سانى 20 مىڭعا جۋىقتاعان.

يراندا  ىزاعا بەرىلگەن مۇسىلماندار "اقش پەن يزرايلگە - ءولىم!" دەپ ورتالىققا جينالسا، ءدال وسىنداي نارازىلىق قوزعالىستارى يەمەن مەن اۋعانىستاندا جانە يراكتىڭ استاناسى باعداد قالاسىندا  بولعان.

مۇسىلماندار كوپ شوعىرلانعان مالايزيا مەن يندونەزيادا اقش ەلشىلىگىنىڭ ماڭىنا جينالعان جۇرتشىلىق "يەرۋساليمنەن قولىڭدى تارت، امەريكا!" دەپ ۇرانداتىپ، دونالد ترامپ بەينەلەنگەن پلاكاتتاردى ورتەدى. ەلشىلىككە باسىپ كىرمەك بولعان بىرنەشە مۇسىلماندى جەرگىلىكتى قاۋىپسىزدىك قىزمەتى توقتاتقان.

“The Qazaq Times”