فوتو: AFP

بۇۇ-نىڭ قاۋىپسىزدىك كەڭەسى اقش-تىڭ يەرۋساليمدى ءيزرايلدىڭ استاناسى دەپ مويىنداۋىنا بايلانىستى كەزەكتەن تىس جيىن وتكىزدى. امەريكانىڭ پالەستينا مەن يزرايل اراسىنداعى قاقتىعىستاردىڭ قايتا جاندانۋىنا سەبەپ بولعان شەشىمىن الەمدىك دەڭگەيدە تالقىلاۋدى قاۋىپسىزدىك كەڭەسىنىڭ  مۇشەلىگىنە كىرمەيتىن 14 مەملەكەتتىڭ 8-ءى قولداعان. بۇل تۋرالى AFP اقپاراتتىق اگەنتتىگى جازدى. 

بۇۇ-نىڭ تاياۋ شىعىستاعى بەيبىتشىلىك ماسەلەلەرى بويىنشا وكىلى نيكولاي ملادەنوۆ اقش-تىڭ الەم ەلدەرىنىڭ ەسكەرتۋىنە قاراماستان قابىلداعان اسىعىس شەشىمى وڭىردەگى تۇراقتىلىقتى بۇزۋى مۇمكىن دەگەن الاڭداۋشىلىق ءبىلدىردى.

اقش-تىڭ بۇۇ-داعى ەلشىسى نيككي حەيلي دونالد ترامپ پالەستينا مەن يزرايل اراسىندا ونداعان جىلدار بويى شەشىمىن تابا الماي كەلە جاتقان شەكارا ماسەلەسىنىڭ سوڭعى نۇكتەسىن قويۋعا العاشقى قادام جاساعانىن ايتادى. امەريكالىق وكىل يزرايل ۇكىمەتى مەن پارلامەنتىنىڭ يەرۋساليمدە وتىرعانىنىڭ ءوزى بۇل قالانىڭ استانا اتانۋعا ابدەن قۇقىلى ەكەنىن كورسەتەتىنىن اتاپ ءوتتى. "مەن بۇگىنگى باس قوسۋعا جينالعان ازاماتتاردىڭ الاڭداۋشىلىعىن تۇسىنەمىن. وزگەرىستەر  قاشاندا كۇردەلى", - دەدى نيككي حەيلي.

“The Qazaq Times”