Yahoo كومپانياسىنىڭ شتاب پاتەرى. فوتو: WSJ.

حالىقارالىق جەلى شابۋىلمەن ايىپتالعان قازاقستاندىق حاكەر كاريم باراتوۆ سەيسەنبى كۇنى «2014 جىلعى Yahoo كومپانياسىنىڭ (Yahoo! Inc. /YHOO) قاۋىپسىزدىك جۇيەسىنە شابۋىل جاساۋ ىسىنە تىكەلەي قاتىسى بار» دەگەن ايىپتى مويىنداۋى مۇمكىن. اقش-تىڭ فەدەرالدىق ايىپتاۋ اكتىسىندە شابۋىل جوسپارىن رەسەيلىك شپيوننىڭ جوسپارلاعانى ايتىلعان. بۇل تۋرالى «WSJ» باسىلىمى حابارلادى.

22 جاستاعى قازاقستان جانە كانادا ازاماتى كاريم باراتوۆ بيىل ناۋرىزدا تورونتودا ۇستالعان. كوپ وتپەي اقش شەنەۋنىكتەرى فەدەرالدىق شاعىم جاريالاپ، باراتوۆتى ەكى رەسەيلىك تىڭشىمەن بىرلەسىپ  Yahoo كومپانياسىنىڭ دەرەكتەرىن ۇرلادى دەپ ايىپتادى. بۇل تۋرالى باراتوۆتىڭ ادۆوكاتى تۇسىنىك بەرۋدەن باس تارتتى.

قازاقستان جانە كانادا ازاماتى كاريم باراتوۆ. فوتو: iStory.kz.

سولتۇستىك كاليفورنيا سوتىنىڭ ۆەب-سايتىنداعى مالىمەتتە «باراتوۆ سەيسەنبى كۇنى تاڭەرتەڭ بولاتىن اقش فەدەرالدىق سۋدياسى ۆينس چحابريا (Vince Chhabria)  توراعالىق ەتكەن سان-فرانتسيسكوداعى سوت وتىرىسىنا قاتىسادى» دەلىنگەن. سونىمەن بىرگە، بۇل وتىرىستا باراتوۆ ءوزىنىڭ كىناسىز ەكەنىن دالەلدەۋىنە مۇمكىندىگى بار.

دەرەككوزدەرىنىڭ مالىمەتىنە قاراعاندا، باراتوۆتىڭ ادۆوكاتى مەن فەدەرالدىق ايىپتاۋشىلار اراسىنداعى ۇزاق ۋاقىتقا سوزىلعان كەلىسسوزدەن كەيىن، باراتوۆ كىناسىن مويىندايدى دەپ كۇتىلۋدە. قازىرگى ۋاقىتتا باراتوۆتىڭ ءوزىن اقتاۋ ءوتىنىشىنىڭ شارتتارىن انىقتاۋ مۇمكىن ەمەس. دەگەنمەن، ەكى جاق تا ۇسىنىلعان كەلىسىمدى جويۋ تۋرالى شەشىم قابىلداي الادى.

“The Qazaq Times”