سولتۇستىك كورەيادان قاشىپ شىققان ايەل جاۋىنگەرلەر ارميا قاتارىندا كورگەن قيىنشىلىعىن ايتىپ بەردى

سولتۇستىك كورەيا ارمياسى سانى جاعىنان الەمنىڭ ءتورتىنشى ورنىندا. ارميادا ەر جاۋىنگەرلەردەن تىس ايەلدەردىڭ سانى دا از ەمەس. الايدا، سولتۇستىك كورەيا ارمياسىنىڭ ءتارتىپ-ءتۇزىمى ايەل اسكەرلەر ءۇشىن تىم اۋىر تيەتىنى، سول ارميا سابىنان قاشىپ شىققان ءبىرلى-جارىم ايەل اسكەرلەر جاعىنان ءمالىم بولىپ وتىر.  BBC-ءدىڭ رەسمي سايتىندا سولتۇستىك كورەيا ارمياسىنىڭ قاتارىنان قاشىپ شىققان لي سو يوننىڭ ءسوزىن جاريا ەتتى.

لي سو يوننىڭ ايتۋىنشا، ارميا قاتارىندا ۇرىپ سوعۋ، زورلىقتى كۇش قولدانۋ، الىمجەتتىلىك ىستەرى ءجيى ورىن الاتىندىقتان، ايەلدەردىڭ قالىپتى فيزيولوگيالىق عادەتى بۇزىلۋ سىندى ىستەر كوپتەپ ۇشىراسادى ەكەن. ول كحدر قارۋلى كۇشتەرى قاتارىندا 10 جىلعا جۋىق قىزمەت ەتكەن. ونىڭ وزىندە سول ەلدەگى 90-ءشى جىلدارى بولعان اشتىقتا، كەمىندە تاماقتان تارشىلىق كورمەس ءۇشىن ايەل اسكەرلەر قاتارىنا قوسىلعان. ونىڭ سوزىنە سەنسەك، سولتۇستىك كورەيا اسكەرلەرى تىم جاپالى تۇرمىس وتكىزەتىن كورىنەدى.

لي سو يون سوزىندە: «ايەل اسكەرلەر تۇراتىن كورپۋستاردا ۇنەمى ىستىق سۋ بولمايدى. جۋىنۋ ءۇشىن شاتىرلاردان اعىپ تۇسكەن جاڭبىر سۋىن پايدالاناتىن. ونىمەن بىرگە كەيدە قۇرت-قۇمىرسقا  باقا، جىلاندار دا اعىپ كەلەتىن.»، – دەيدى. ول جانە ەكى قاباتتى توسەكتەردىڭ توسەنىشتەرى كۇرىش ساباندارىنان جاسالاتىندىقتان جايسىز ءارى جاتتىعۋدا كەيىنگى تەر ءيىسى ءسىڭىپ ۇزاق مەزگىل سول ءيىستىڭ كەتپەيتىنىن دە ەسكە الدى. ول جانە وزىمەن قاتار مىڭداعان ايەلدەردىڭ اشتىق جىلدارىندا تاماق اسىراۋ ءۇشىن ارميا قاتارىنا قوسىلعانىن ايتىپ بەرگەن.

17 جاسىندا ارميا قاتارىنا كىرگەن لي سو يونعا العاشىندا اسكەري ءومىرى ۇناعان. پاتريوتيزم سەزىمى مەن ساپتاستار ارا بەرىك ماحاببات ورناتقان. ارمياداعى ءتارتىپ ايەلدەر مەن ەركەكتەرگە قاشاندا بىردەي جۇرگىزىلگەن. دەگەنمەن، فيزيكالىق كۇشتى تالاپ ەتەتىن اۋىر جۇمىستاردان ايەل اسكەرلەر بوساتىلىپ، ەسەسىنە كۇن سايىن تاماق دايارلاۋ، تازالىق، رەتتەۋ جۇمىستارىنا تارتىلعان. تىنىمسىز جاتتىعۋلار مەن جەتەرلىك تاماقتانباۋ اقىرى ولاردىڭ دەنساۋلىقتارىنا اسەر ەتە باستاعانىن ايتادى لي سو يون. دۇرىس تاماقتانباۋ مەن قالىپسىز ءارى توقتاۋسىز جاتتىعۋ التى اي نەمەسە ءبىر جىلدا ارميا قاتارىنداعى بارلىق ايەل اسكەرلەردىڭ فيزيولوگيالىق ادەتتەرىنىڭ تسيكلىن بۇزعان. ءتىپتى كەيبىرىنىڭ ەتەككىرى كەلمەيتىن بولعان.

سولتۇستىك كورەيا ارمياسىندا ايەلدەردىڭ مۇنداي وزگەشە فيزيولوگيالىق جاعدايلارىنا مۇلدە كوڭىل بولىنبەيتىنىن ايتادى كۋاگەر. ءتىپتى قاتارداعى ايەل جاۋىنگەرلەرگە فيزيولوگيالىق ادەتى كەزىندە پايدالاناتىن تازالىق بۇيىمدارىدا تولىق قاراستىرىلماعان. سوندىقتان، كەيبىر الەدەر ارميا قاتارىندا ءوزىنىڭ ەتەككىرىنىڭ كەلمەي قالعانىنا قۋانعان.

2015 جىلى سولتۇستىك كورەيادا 18 جاسقا تولعان بارلىق ايەلدەرگە 7 جىل اسكەري مىندەت وتەۋ كەرەك دەگەن بەلگىلەمە شىعاردى. ال ەرلەرگە بۇل ەلدە اسكەري مىندەت 10 جىل دەپ بەلگىلەنگەن. بۇل قازىر الەمدەگى اسكەري مىندەتتەگى ەڭ ۇزاق مەرزىم. رەسمي مالىمەتتەرگە قاراعاندا ەلدىڭ 15 پايىز شىعىمى ارمياعا ارنالادى. بىراق، كەيبىر مالىمەتتەردە بۇل ءتىپتى 40 پايىزدى قۇراۋى مۇمكىن دەلىنگەن.

لي سو يون سەكىلدى سولتۇستىك كورەيا ارمياسىنىڭ قاتارىندا بولعان بەك پەن موريلو قىزداردىڭ ارميا قاتارىندا جىنىستىق زورلىققا كوپتەپ ۇشىرايتىنىن دا ايتقان. موريلونىڭ ايتۋىنشا، بۇل تۋرالى ارميا قاتارىنداعى قىزدار اراسىندا اڭگىمەلەر بولعاندا، كوبى دەرلىك وزگەلەردىڭ باسىندا بولعان جاعدايدى ايتىسادى. الايدا، وسىنداي زورلىق-زومبىلىق ىستەرى وزدەرىنىڭ باسىندا دا بولعان دەيدى. لي سو يون دا بۇل جاعدايدى راستايدى. لي سو يون ارميا قاتارىنان شىققاننان كەيىن تۇرمىستىق قيىندىقتارعا شىداماي، وڭتۇستىك كورەياعا قاشىپ كەتۋگە بەكىنگەن. بىراق، قىتاي مەن سولتۇستىك كورەيا شەكاراسىندا ۇستالىپ، ءبىر جىل تۇرمەگە وتىرعان.

كەيبىر ساراپشىلاردىڭ ايتۋىنشا، سولتۇستىك كورەيادان قاشىپ شىققانداردىڭ بەرگەن مالىمەتىنىڭ بارىنە سەنە بەرۋگە بولمايتىنىن ايتادى. سەبەبى، ولار بەرگەن مالىمەتتەرىنە اقشا الۋ ءۇشىن كەيبىر جاعدايلاردى اسىرا ايتۋى مۇمكىن ەكەنىن العا تارتادى. دەگەنمەن، BBC لي سو يوننىڭ بۇل مالىمەتتەر ءۇشىن اقشا الۋدان باس تارتقانىن ەسكەرتكەن.

“The Qazaq Times”