فوتو: You Tube

رەسەي اقش-تىڭ ەكس-مەملەكەتتىك حاتشىسى حيللاري كلينتوننىڭ كومەگىمەن قازاقستان مەن ارمەنيا ۋرانىنا قالاي يە بولدى؟ بۇل سۇراققا جاقىندا Fox News تەلەارناسىنا سۇحبات بەرگەن «كلينتون كەش» كىتابىنىڭ اۆتورى پيتەر شۆەيتسەر جاۋاپ بەرگەن.

ونىڭ سوزىنشە، حيللاري كلينتون قازاقستاننىڭ جوعارى لاۋازىمدى باسشىلارىنا وزىمەن كەزدەسۋ ءۇشىن كانادالىق بيزنەسمەن فرەنك گيۋستراعا قازاقستانداعى ۋران كەن ورىندارىن بەرۋلەرى كەرەكتىگىن ايتىپ شارت قويعان. بۇل شارتتى ورىنداماعان جاعدايدا ول ەشكىممەن كەزدەسپەيتىندىگىن ايتقان. پيتەر شۆەيتسەردىڭ ايتۋىنشا، گيۋستارا حيللاري كلينتوننىڭ كۇيەۋى، ساياساتكەر، اقش-تىڭ بۇرىنعى پرەزيدەنتى بيلل كلينتوننىڭ جاقىن دوسى. ول ءوزىنىڭ سوزىنە دالەل رەتىندە 2015 جىلى The New York Times  باسىلىمى تاراتقان مالىمەتتى مىسالعا كەلتىرەدى. اتالمىش ماتەريالدا فرەنك گيۋستارانىڭ كلينتوندار وتباسىلىق قورىنا قايىرىمدىلىق كومەك رەتىندە 100 ميلليون دوللار قارجى اۋدارعاندىعى جايىندا ايتىلعان.

پيتەر شۆەيتسەردىڭ سوزىنە سەنەتىن بولساق، فرەنك گيۋستارا قازاقستانداعى ۋران كەن ورىندارىن العاننان كەيىن، ونى «Uranium One» كومپانياسىنىڭ يەلىگىنە وتكىزگەن. وڭتۇستىك افريكا مەن اۆستراليادا ۋران كەن ورىندارى بار «Uranium One» كومپانياسى 2009 جىلى ءوزىنىڭ 17 پايىز اكتسياسىن رەسەيلىك ۋران الپاۋىتى «روساتوم» كومپانياسىنا ساتىپ جىبەرگەن. ارادا ءبىراز ۋاقىت وتكەنەن كەيىن «روساتوم» حيللاري كلينتوننىڭ قاتىسۋىمەن اقش مەملەكەتتىك دەپارتامەنتىنىڭ قولاۋى ارقىلى «Uranium One» كومپانياسىنىڭ 51 پايىز اكتسياسىن يەمدەنگەن. ال 2013 جىلى ءتىپتى «Uranium One» كومپانياسىنىڭ 100 پايىز اكتسياسىن ساتىپ الىپ، امەريكا اتوم سالاسىنا تۇبەگەيلى كىرگەن. «روساتوم»  اقش ۋران سالاسىنا تۇبەگەيلى كىرىپ قانا قويماي، ءبىر مەزەتتە قازاقستان مەن ارمەنيانىڭ دا ۋران كەن ورىندارىنىڭ تولىققاندى قوجايىنى بولىپ شىعا كەلگەن.

“The Qazaq Times”