شي جينپيڭ مەن ءمۇن جاين. فوتو: South China Morning Post.

اقش-تىڭ «ساد» زىمىران قورعانىس جۇيەسىن كورەي تۇبەگىنە ورناتۋ ماسەلەسى ءالى دە قىتاي مەن وڭتۇستىك كورەيا اراسىنداعى ۇزاق ۋاقىتقا سوزىلعان كەلىسپەۋشىلىككە سەبەپ بولىپ كەلەدى. كەشە قىتاي ءسىم باسشىسى ۋاڭ ي جۋرناليستەرمەن كەزدەسكەن كەزدە، ەكى ەل اراسىنداعى سالقىندىق تۋرالى اشىق مويىندادى. دەگەنمەن، جاقىندا ەكى ەل بىردەي ۋاقىتتا ءباسپاسوز ءماسليحاتىن وتكىزۋ ارقىلى، «ساد» ماسەلەسىنە بايلانىستى بىرتىندەپ كونسەنسۋسقا قول جەتكىزگەنىن ايتتى. بۇل تۋرالى «People» باسىلىمىنىڭ رەسمي سايتى حابارلادى.

ۋاڭ ي سوزىندە: «قىتاي وڭتۇستىك كورەيانىڭ ۇستانىمدارىنا كوڭىل بولەدى، ءارى قۇرمەتتەيدى. اقش-تىڭ زىمىرانعا قارسى قورعانىس جۇيەسى ۋاقىتشا ورناتىلادى. بۇلاي بولعاندا ول قىتايدىڭ قاۋىپسىزدىك مۇددەلەرىنە زيان كەلتىرمەيدى. ءبىز سوزىمىزدە تۇرامىز، ۋادەمىزدى ورىندايمىز. ءبىز بۇل ماسەلە ەكىجاقتى كەلىسۋ ارقىلى وڭدى شەشىم تابادى دەپ سەنەمىز»، – دەدى.

قىتاي ءسىم باسشىسى وسىدان ەكى كۇن بۇرىن قىتاي باسشىسى شي جينپيڭ مەن پرەمەر-ءمينيسترى لي كىچياڭ جەكە-جەكە وڭتۇستىك كورەيانىڭ پرەزيدەنتى ءمۇن جاينمەن تەلەفون ارقىلى سويلەسىپ، ەكى ەل اراسىنداعى قارىم-قاتىناستى رەتتەپ، ىنتىماقتاستىقتى قالپىنا كەلتىرۋ تۋرالى ناقتى باعىتتاردى انىقتاعان. بۇعان ءمۇن جاين دا كەلىسىم بەرىپ، ەكى ەل اراسىنداعى كەلىسپەۋشىلىكتى بارىنشا ازايتىپ، الداعى ۋاقىتتا وڭتۇستىك كورەيا مەن قىتاي اراسىنداعى جوعارى الماسۋلارعا دايىن ەكەنىن جەتكىزگەن.

كوپ وتپەي وڭتۇستىك كورەيانىڭ پرەزيدەنتى قىتايعا ساپارلاپ بارماق. ول ساپارىندا قىتايمەن بىرقاتار سالاداعى ءۇزىلىپ قالعان كەلىسىمدەر مەن ىنتىماقتاستىقتى قايتا جانداندىرماق. قىتايدىڭ وڭتۇستىك كورەيا جانە اقش-پەن قارىم-قاتىناستى جاقسارتۋى سولتۇستىك كورەيانى وقشاۋلاۋ ساياساتىنا دەم بەرگەنى بولىپ سانالادى.

“The Qazaq Times”