يراك جوعارى سوتى كۇرد اۆتونومياسىن تولىقتاي باعدات بيلىگىنە باعىندىردى

يراك فەدەرالدىق سوتى ەكى كۇن بۇرىن بۇيرىق شىعارىپ، كۇرد اۆتونومياسىنىڭ وسىدان بۇرىن وتكىزىلگەن رەفەرەندۋمىنىڭ بارلىق ناتيجەسىن كۇشىنەن قالدىردى. ءارى رەفەرەندۋمدى زاڭسىز دەگەن قورىتىندىنى تولىق بەكىتتى. بۇل تۋرالى «People» باسىلىمى حابارلادى.

يراك فەدەرالدىق سوتى بۇل ارقىلى وسىعان دەيىنگى كۇرد ايماعىنىڭ تاۋەلسىزدىك تۋرالى رەفەرەندۋم ناتيجەسىن عانا ەمەس، الداعى ۋاقىتتاعى وسى اۆتونوميانىڭ زاڭسىز رەفەرەندۋمدارىنا شەكتەۋ سالىپ وتىر.

ال، 6 قاراشادا جاريا ەتكەن شەشىمىندە باعدات بيلىگى 2005 جىلى قابىلدانعان جاڭا زاڭ بويىنشا شەشىم قابىلداپ، باعدات بيلىگىنە قاراستى بارلىق پروۆينتسيالار مەن اۆتونوميالاردىڭ يراكتان ءبولىنىپ شىعۋىنا جول بەرىلمەيتىنىن جاريا ەتتى.

يراكتاعى كۇرد اۆتونومياسىنىڭ ۇكىمەتى 14 قاراشادا تاراتقان مالىمەتىندە، يراكتىڭ تۇتاستىعىن، يراك فەدەرالدىق سوتىنىڭ شەشىمىن قۇرمەتتەيتىندىگىن جەتكىزدى. ءارى بارلىق اۋقىمدى ساياسي قادامداردا باعدات بيلىگىمەن كەلىسىم تۇرىندە جۇرگىزەتىنىن، سونداي-اق، يراك ۇكىمەتىمەن كەڭەيتىلگەن كەلىسسوز وتكىزەتىنىن ايتقان ەدى.

“The Qazaq Times”