فوتو: Getty Images

زيمبابۆەنىڭ بيلەۋشى Zanu-PF پارتياسى 93 جاستاعى  پرەزيدەنت روبەرت مۋگابەگە قارسى يمپيچمەنت پروتسەسىن باستادى. مەملەكەت باسشىسى ءوزىنىڭ ايەلى گرەيس مۋگابەگە ەلدى باسقارۋ قۇقىعىن زاڭسىز بەرگەنى ءۇشىن ايىپتالىپ وتىر. بۇگىن پارتيانىڭ ۇسىنىسى پارلامەنتتىڭ قوس پالاتاسى ۇلتتىق اسسامبلەيا مەن سەناتتىڭ وتىرىسىندا قارالادى. پالاتا وكىلدەرىنىڭ ۇشتەن ەكىسى پرەزيدەنتتى لاۋازىمىنان ايىرۋ تۋرالى شەشىم قابىلداسا، سارسەنبى كۇنى روبەرت مۋگابە ورنىن بوساتۋى مۇمكىن. 

زيمبابۆە كونستيتۋتسياسىنا سايكەس، پرەزيدەنت ەلدىڭ باستى زاڭىن بۇزاتىن ارەكەتتەر جاساعان جاعدايدا، قىزمەتىنەن بوساتىلادى. روبەرت مۋگابە ۇكىمەتتى باسقارۋ قۇقىعىن ايەلىنىڭ قولىنا زاڭسىز تابىستاعىسى كەلگەنى جانە مەملەكەتتىك شەشىمدەر قابىلداۋ ىسىنە ارالاسۋ ەركىن بەرگەنى ءۇشىن كىنا ارقالاپ وتىر. قارت پرەزيدەنتتىڭ دەنساۋلىعى ناشارلاۋىنا وراي، ونان كەيىنگى بيلىكتە قالاتىن باسقارۋشى رولىنە ايەلى - گرەيس مۋگابە مەن ۆيتسە-پرەزيدەنت ەممەرسون منانگاگۆا ۇمىتكەر بولعان. اسكەريلەردىڭ بيلىكتى ءوز قولدارىنا العان "مەملەكەتتىك توڭكەرىسىنە" وسىدان ەكى اپتا بۇرىن روبەرت مۋگابەنىڭ ءوز ۆيتسە-پرەزيدەنتىن سەبەپسىز قىزمەتىنەن بوساتقانى تۇرتكى بولعان. اسكەر باسشىلارى مەن گەنەرالدار مەملەكەت باسشىسىنىڭ بۇل ارەكەتىن ءوز ايەلىنە بيلىكتى قالدىرۋ ءۇشىن جاسالعان شارا دەپ ءتۇسىنىپ، روبەرت مۋگابەنى ءۇي قاماعىنا الىپ، ەلدى ءوز قاداعالاۋىنا العان ەدى.

ساراپشىلاردىڭ پىكىرىنشە، اسكەريلەردىڭ بۇل ارەكەتىن "مەملەكەتتىك توڭكەرىس" دەپ اتاۋعا ابدەن بولادى. زيمبابۆەنىڭ اسكەري باسشىلارى بۇل مالىمدەمەنى جوققا شىعارعانىن ەسكەرسەك، پرەزيدەنتكە يمپيچمەنت جاريالاناتىن بولسا، ولاردىڭ مەملەكەت باسشىسىن ورنىنان الىپ تاستاۋ ءىسى "زاڭدى" دەپ سانالاتىن بولادى.

روبەرت مۋگابەنىڭ زيمبابۆەنى 37 جىلدان بەرى باسقارىپ كەلە جاتقانىنا نارازى حالىق كوشەلەردە شەرۋ ۇيىمداستىردى. پرەزيدەنت لاۋازىمىنان ايىرىلسا، ونىڭ ءرولىن قازىرگى پرەمەر-مينيستر پەلەكەزەلا مپوكو ءوز قولىنا الۋى مۇمكىن. دەگەنمەن ول گرەيس مۋگابەنىڭ جاقىن قولداۋشىسى بولعاندىقتان، بيلەۋشى پارتيا ەكس-پرەمەردى ەلگە قايتاراتىنى بەلگىلى.  Zanu-PF پارتياسى  جەكسەنبى كۇنى ەممەرسون منانگاگۆانى توراعا ەتىپ سايلادى.

وسىدان بۇرىن وپپوزيتسيالىق MDC-T پارتياسىنىڭ روبەرت مۋگابەگە يمپيچمەنت جاريالاۋ تۋرالى باستاماسى ءساتسىز اياقتالعان بولاتىن. وسى جولى پارلامەنتتە باسىم داۋىسقا يە، بيلەۋشى Zanu-PF پارتياسى مۇشەلەرىنىڭ پرەزيدەنتكە قارسى بىرىگىپ وتىرعانى ماسەلەنىڭ قالاي اياقتالاتىنىن اڭعارتادى.

“The Qazaq Times”