يادرولىق سوعىستىڭ بىلتەسى ترامپتىڭ قولىندا ما؟

قازىرگى الەمدىك جاعدايدان الىپ قاراعاندا، كوزقاراقتى ادامداردى  يادرولىق سوعىستىڭ تۋ ىقتيمالدىعى الاڭداتاتىنى بەلگىلى بولدى. ونى باتىس ەلدەرىندەگى ساراپتاۋ ورتالىقتارى دايىنداعان ساۋالناما ناتيجەلەرى ايقىنداپ وتىر. سولتۇستىك كورەيا ماسەلەسى، اقش-كحدر اراسىنداعى شيەلەنىستىڭ ۋشىعۋى بۇل قاۋىپتى ءتىپتى دە جاقىنداتىپ، الەم ەلدەرىن ۇرەيگە سالىپ وتىرعانى جاسىرىن ەمەس.

سولتۇستىك كورەيانىڭ بيلىگىنە كيم جوڭ ۋن يادرولىق باعدارلامانى دامىتۋدى قارقىندى تۇردە قولعا الدى. ال، اقش پرەزيدەنتى بولىپ سايلانعاننان كەيىن ترامپتىڭ كحدر-عا قاراتقان پوزيتسياسى ءتىپتى قىزۋقاندى كۇيگە ءوتتى. ەكى ەل ءبىر-بىرىنە بىرنەشە مارتە يادرولىق سوعىستىڭ قاتەرىن ءتوندىردى. وسى كەزەڭدەردە الەم جۇرتشىلىعى ترامپتىڭ سولتۇستىك كورەياعا تۇتقيىل يادرولىق شابۋىلعا بۇيرىق بەرىپ جىبەرۋىنەن الاڭداعانى انىق. سەبەبى، ارەكەتى سالماقتى ساياساتكەرگە ۇقساي بەرمەيتىن امەريكالىق باسشىنىڭ ءجۇرىس تۇرىسى ەسەر، جەڭىلتەك ادامعا كوبىرەك ۇقساعان ەدى. ترامپ راسىندا يادرولىق سوعىسقا بۇيرىق بەرسە بۇل اقش قارۋلى كۇشتەرى بۇيرىقتى ورىنداۋعا قانشالىقتى سەنىمدى؟ اقش ءۇشىن يادرولىق سوعىستىڭ بىلتەسى تەك ترامپتىڭ قولىندا ما؟ جاقىندا بۇل سۇراققا جاۋاپ تابىلعانداي بولدى.

قۇراما شتاتتىڭ ستراتەگيالىق قولباسشىلىعىنىڭ (STRATCOM) بۇرىنعى باسشىسى روبەرت كەحلەر بۇل تۋرالى پىكىرىن ءبىلدىرىپ: «اقش ارمياسى پرەزيدەنتىڭ يادرولىق سوعىس تۋرالى «زاڭسىز بۇيرىعىن» ورىنداماۋ قۇقىعىنا يە»، – دەگەن جاۋابىن بەردى. ول سوزىندە  STRATCOM اق ۇيگە قاۋىپ تونبەي تۇرىپ، بۇرىن قابىلدانعان شەشىم بويىنشا يادرولىق سوعىستى اشپاۋىنا قۇقىلى ەكەنىن جەتكىزدى.

كەحلەر بۇل پىكىرلەرىمەن قاتار: «دەگەنمەن، ۇلتتىق قاۋىپسىزدىك سالاسىندا پرەزيدەنت قۇقىعىنىڭ شەكتەلە بەرۋىنە قارسىمىن»، – دەدى. قاۋىپسىزدىك سالاسىندا پرەزيدەنتتىڭ قۇقىعى شەكتەلە بەرسە بۇل ەلدىڭ قورعانىس قابىلەتىن ايتارلىقتاي تومەندەتەتىنىن ايتىپ ءوتتى.

“The Qazaq Times”