وڭتۇستىك كورەيادا بولعان جەر سىلكىنىسىنەن مىڭ جارىم ادام باسپاناسىز قالدى

وڭتۇستىك كورەيادا بولعان 5,4 باللدىق جەر سىلكىنىسى سالدارىنان 50 ادام جاراقاتتانىپ، 1 مىڭ 500 ادام ۋاقىتشا لاگەرلەرگە جەتكىزىلدى. ەلدىڭ وڭتۇستىگىندە تىركەلگەن تابيعات اپاتى 9 كم تەرەڭدىكتە بولعان جانە ەل استاناسى سەۋلدى قوسى العاندا، بىرقاتار ەلدى مەكەندەر مەن ءىرى قالالاردى قامتىعان. مينيسترلىكتىڭ مالىمەتىنشە، وقىس جاعدايدان 1100 تۇرعىن ءۇي مەن 100 مەكتەپ زارداپ شەككەن. 

قازا تاپقاندار تۋرالى راستالعان اقپاراتتى جوقتىعى قۋانتقانىمەن، رەسمي دەرەكتەر 57 ادامنىڭ ءارتۇرلى دەڭگەيدەگى جاراقات الىپ، 1 536 تۇرعىننىڭ ءوز ۇيلەرىن تاستاپ كەتۋگە ءماجبۇر بولعاندارىن جەتكىزدى. بۇل 2016 جىلدىڭ قىركۇيەك ايىندا وڭتۇستىك-شىعىستاعى كەندجۋ قالاسىندا بولعان 5,8 باللدىق جەر سىلكىنىسىنەن كەيىن قايتالانىپ وتىرعان ەكىنشى اپات.

الەۋمەتتىك جەلىلەردە قيراعان ۇيلەر مەن جان ۇشىرا ايقايلاپ، جان-جاققا جۇگىرگەن حالىقتىڭ، وقۋ ورنىنداعى ستۋدەنتتەردىڭ ۆيدەولارى كوپ قارالىپ جاتىر. ازاماتتاردىڭ جەكە باسىنىڭ قاۋىپسىزدىگىن قامتاماسىز ەتۋ ماقساتىنداعى ەل ۇكىمەتى وسى بەيسەنبى كۇنى وتەتىن جالپىحالىقتىق ەمتيحاندى ءبىر اپتاعا كەيىن شەگەردى.

كورشىلەس جاپونيامەن سالىستىرعاندا، وڭتۇستىك كورەيادا سەيسميكالىق قوزعالىستار از بولاتىنىنا قاراماستان، جەراستى دۇمپۋلەرى ۇنەمى ءجىتى قاداعالاۋدا. ويتكەنى جەر سىلكىنىسى ادەتتە سولتۇستىك كورەيا يادرولىق قارۋ قولدانعاننان كەيىن بولادى.

“The Qazaq Times”