فوتو عالامتور بەتتەرىنەن الىندى.

ۆەنەسۋەلا ماسكەۋ الدىنداعى سىرتقى قارىزىن قايتارۋ شارتتارىن جەڭىلدەتۋ بويىنشا رەسەيمەن كەلىسىمگە كەلدى. ۆەنەسۋەلانىڭ قارجى ءمينيسترى سايمون زەرپانىڭ باسشىلىعىمەن كەلگەن دەلەگاتسيا 2011 جىلى رەسەيدەن قارۋ-جاراق ساتىپ الۋ ارقىلى پايدا بولعان قارىزىن الداعى 10 جىل ۋاقىت كولەمىندە العاشقى التى جىل بويى ەڭ تومەنگى مولشەرلەمەمەن قايتارۋ تۋرالى ورتاق شەشىمگە قول قويدى. 

ۆەنەسۋەلا مۇناي باعاسىنىڭ تومەندەۋى مەن اقش-تىڭ سالعان سانكتسيالارىنان كەيىن ەكونوميكاسىنىڭ كۇرت قۇلدىراۋىنا بايلانىستى سىرتقى قارىزدارىن قايتارا المايتىنىن مالىمدەگەن بولاتىن. ەل پرەزيدەنتى نيكولاس مادۋرو رەسەيدىڭ مەملەكەتتىڭ باسىنا قيىن كۇن تۋعان كەزدە تانىتقان تۇسىنىستىگى قوس تاراپتىڭ قارىم-قاتىناسىن جاڭا بەلەسكە كوتەرەتىنىن ايتتى.

ۆەنەسۋەلادا ءساۋىر ايىنان بەرى جالعاسىپ كەلگەن كوتەرىلىس، بەلەڭ العان جۇمىسسىزدىق، قىلمىس پەن الەۋمەتتىك ماسەلەلەردىڭ ۋشىعۋى مەملەكەت الدىنا تەز ارادا شەشىمدەر تابۋ مىندەتىن قويىپ وتىر. ەندى تولىقتاي يمپورتقا تاۋەلدى بولىپ وتىرعان مەملەكەت سىرتقى قارىزىنان ۇنەمدەگەن قارجىعا  ازىق-تۇلىك پەن ءدارى-دارمەك سياقتى زاتتار ساتىپ الاتىن بولادى.

نيكولاس مادۋرو ەكونوميكانى قايتا اياققا تۇرعىزاتىنىنا سەنىمدى بولعانىمەن، Standard and Poors  اگەنتتىگى ەلدە دەفولت باستالعانىن حابارلادى. ۆەنەسۋەلا قازىناسىندا 9,7 ملرد اقش دوللارى قالعان. بيىلعى جىلدىڭ سوڭىنان دەيىن مەملەكەت كرەديتورلارعا 1,47 ملرد $, ال 2018 جىلى 8 ملرد $ تولەۋى كەرەك.

“The Qazaq Times”