ناتو اۋعانىستانعا تاعى دا اسكەر جىبەرەدى

بۇگىن ناتو-عا مۇشە مەملەكەتتەردىڭ قورعانىس مينيسترلەرى بريۋسسەلدە اۋعانىستاندا 16 جىلدان بەرى جالعاسىپ كەلە جاتقان قاقتىعىستى تالقىلاۋ ءۇشىن باس قوسادى. وسى اپتادا ناتو اۋعانىستانعا قوسىمشا 3 مىڭ اسكەر جىبەرىپ، ونداعى وداقتاس مەملەكەتتەر كۇشتەرىنىڭ سانىن 16 مىڭعا جەتكىزەتىنىن حابارلاعان بولاتىن. بۇل تۋرالى APF اقپاراتتىق اگەنتتىگى جازدى. 

قوسىمشا اسكەر اۋعانىستان كۇشتەرىن جاتتىقتىرۋ، اسكەري وپەراتسيالاردى ۇيىمداستىرۋ جانە باسقارۋ ىستەرىنە كومەكتەسەدى. ناتو اۋعانىستانداعى جاعداي 2018 جىلى رەتتەلە باستايتىنىنا سەنىم ءبىلدىردى. "قازىردىڭ وزىندە اۋەدەن بومبىلاۋ جانە قۇرلىق اسكەرىنىڭ بىرلەسكەن قيمىلدارى تاليباندىقتاردىڭ شەگىنۋىنە اسەر ەتىپ وتىر", -  دەيدى ۇيىم وكىلدەرى.

اقش پرەزيدەنتى وسى جىلى امەريكانىڭ اۋعانىستانداعى ستراتەگياسىن جاريالاعان كەزدە، ءوز اسكەرىن ول جاقتان تاليباندىقتاردى تاس-تالقان ەتىپ جەڭبەيىنشە قايتارمايتىنىن ايتقان بولاتىن. مەملەكەت باسشىسىنىڭ وسى سوزىنەن كەيىن امەريكالىق اسكەريلەرگە ءىس-ارەكەت ەركىندىگى بەرىلدى. بىراق بۇل ماسەلەنىڭ ەكىنشى تۇسى دا بار. ەندى جاۋدىڭ كوزىن قۇرتۋدى ماقسات ەتكەن شەتەلدىك كۇشتەر كوزىنە تۇسكەن ايماقتى بومبالاپ، بەيبىت حالىقتىڭ شىعىنى ارتۋى مۇمكىن.

“The Qazaq Times”