باحرەين كاتارمەن الدەقاشان شەشىلگەن تەرريتوريالىق داۋىن قايتا باستاپ وتىر

باحرەين كاتارمەن ارادا الدەقاشان شەشىمىن تاپقان تەرريتوريالىق داۋىن قايتا باستادى. پارسى شىعاناعى ەلدەرىندەگى داعدارىستى سىلتاۋراتقان باحرەين حالىقارالىق سوتتىڭ 2001 جىلعى زۋبارا قالاسى مەن حابار جانە جانان ارالدارىنا قاتىستى شەشىمىنە كەلىسپەيتىنىن ەندى عانا ايتىپ وتىر. بۇل تۋرالى ءال-جازيرا اقپاراتتىق اگەنتتىگى جازدى. 

باحرەيننىڭ مەملەكەتتىك اقپاراتتىق اگەنتتىگى جاريالاعان پرەسس-رەليزدە: "باحرەيننىڭ وزىنەن كۇشپەن تارتىپ الىنعان دۇنيەلەردى تالاسقا سالۋعا جانە كاتاردىڭ لەگيتيمدىلىگىنە قاتىستى كۇمان تۋدىرۋعا تولىق قۇقىعى بار", - دەلىنگەن. وسىدان بۇرىن كاتارمەن قارىم-قاتىناسىن ۇزگەن وزگە اراب ەلدەرىنىڭ قاتارىنداعى باحرەين پارسى شىعاناعى ەلدەرىنىڭ جيىنىنا دوحا وكىلدەرى بارسا، ءوزىنىڭ قاتىسۋدان باس تارتاتىنىن حابارلاعان بولاتىن.

باحرەين مەن كاتار اراسىنداعى زۋبارا قالاسى مەن حابار جانە جانان ارالدارىنا قاتىستى تەرريتوريالىق داۋ 1900 جىلداردان بەرى بار. 1991 جىلى كاتار شەشىمىن تاپپاعان ماسەلەنى حالىقارالىق سوتتىڭ قاراۋىنا بەردى. 2001 جىلى حالىقارالىق سوت باحرەينگە حابار ارالىن، ال كاتارعا جانان ارالى مەن زۋبارا قالاسىن بەرۋ تۋرالى ۇكىم شىعاردى. وسىلاي 16 جىل بۇرىن نۇكتەسى قويىلعان ماسەلەنى قايتا كوتەرىپ وتىرعان باحرەين ء"بىز تاريحي قۇقىقتارىمىزدىڭ كوبىن پارسى شىعاناعى ەلدەرىنىڭ مۇددەسىنە جىعىپ بەرگەن ەكەنبىز", - دەپ مالىمدەدى.

“The Qazaq Times”