فوتو: apple.com

Apple كومپانياسىنىڭ سوڭعى جاڭالىعى iPhone X سمارتفوندارى الەمنىڭ 50-گە جۋىق ماركەتتەرىندە ساتىلىمعا شىعارىلدى. جۇما كۇنى ەۋروپا، ازيا مەن امەريكا قۇرلىعىنداعى سۋ جاڭا گادجەتتى ساتىپ الۋعا ىنتالى ادامدار ۇزىن-سونار كەزەككە تۇرىپ، فرانتسيادا، ءتىپتى حالىقتىق نارازىلىق شاراسىنا ۇلاستى. بۇل تۋرالى تولىعىراق APF اقپاراتتىق اگەنتتىگى جازدى. 

سان-فرانتسيسكوداعى دۇكەنگە گادجەت ساتىپ الۋعا ارنايى كەلگەن گيلەرمە روسسي (Guilherme Rossi) ءوزىنىڭ تۇرعىلىقتى مەكەنى برازيلياداعى ۇلكەن كەزەكتە تۇرعىسى كەلمەي، امەريكاعا كەلگەنىن ايتادى. ونىڭ مالىمەتىنشە، مۇنداعى iPhone X قۇنى 999 دوللاردان باستالادى.

فرانكفۋرتتان 30 كم قاشىق ورنالاسقان گەيدەلبەرگتەن كەلگەن مۇعالىم مۇندا Apple كومپانياسىنىڭ جاڭا ءونىمى 10 مينۋتتا ساتىلىپ كەتكەنىن حابارلادى.

پاريجدەگى Apple دۇكەنىنىڭ الدىندا جينالعان كەزەكتە بولعان قوعام بەلسەندىلەرى امەريكالىق كومپانيا مەن ەۋروپا اراسىنداعى سالىققا بايلانىستى كەلىسپەۋشىلىكتەرگە توقتالۋدى ءجون كورگەن. ولار كومپانيا وكىلدەرىنە الما لاقتىرىپ، "الما، سالىق تولە!" (Apple, pay your taxes) دەپ ۇرانداتقان.

وڭتۇستىك-شىعىس ازياداعى Iphone-نىڭ جاڭا ۇلگىسى ساتىلىمعا قويىلعان جالعىز دۇكەن - سينگاپۋردا. مۇنداعى دۇكەن الدىنا جينالعان 300-گە جۋىق ساتىپ الۋشى ءتۇندى وسىندا وتكىزگەن.

ەڭ العاشقى Iphone شىعارىلىمىنىڭ ونجىلدىعىنا وراي جارىق كورگەن Iphone X گادجەتى تەحنيكالىق جابدىقتار اراسىنداعى سوڭعى كۇندەرى ەڭ كوپ تالقىعا تۇسكەن مودەلگە اينالدى. Apple كومپانياسىنىڭ تابىسى قىركۇيەك ايىندا 12 پايىزعا ءوسىپ، 52,6 ملرد دوللاردى قۇراعان.

“The Qazaq Times”