ناتو ۇيىمى سولتۇستىك كورەياعا قارسى كۇرەسۋگە دايىن ەكەنىن جەتكىزدى

سولتۇستىك اتلانتيكالىق كەلىسىم ۇيىمى (ناتو) سولتۇستىك كورەيانىڭ ارەكەتتەرىنە قارسى تۇرۋعا دايىندالۋدا. بۇل مالىمدەمەنى اتالعان ءىرى اسكەري ۇيىمنىڭ باس حاتشىسى جاسادى، دەپ حابارلادى «شينلاڭ» اقپاراتتىق سايتى.

ناتو-نىڭ باس حاتشىسى يەنس ستولنبەرگ اتالعان مالىمدەمەنى وڭتۇستىك كورەياداعى اسكەري ىستەر جونىندەگى كونفەرەنتسيا بارىسىندا جاريا ەتتى. ول سوزىندە: «ناتو ءوزىنىڭ اسكەري كۇشىن سولتۇستىك كورەيانىڭ ارەكەتتەرىنە قارسى كۇرەسكە پايدالانۋعا ءازىر»، – دەدى.

ناتو مۇشە ەل سانى جاعىنان دا، اۋماعىنىڭ كەڭدىگى جاعىنان دا الەمدە تەڭدەسسىز ۇيىم بولىپ سانالىپ كەلەدى. ەكىنشى دۇنيە سوعىسىنان كەيىن قۇرامىنا سولتۇستىك جارتى شاردىڭ كوپتەگەن ەلدەرىن مۇشە ەتكەن بۇل ۇيىم، قىرعي-قاباق سوعىس جىلدارىندا دا ءوزىنىڭ مىعىم قۋاتىن ايگىلەگەن بولاتىن. ۇيىم اتىنان سويلەگەن يەنس ستولنبەرگ: «ناتو-نىڭ زىمىرانعا قارسى تۇرۋداعى تاجىريبەسىمەن مۇمكىندىكتەرى سىننان وتكەن. بۇل مۇمكىندىكتەرىن سولتۇستىك كورەياعا قارسى پايدالانۋعا دايىن»، – دەدى.

قازىر اقش جانە وعان وداقتاس وڭتۇستىك كورەيا مەن جاپونيا، سونداي-اق اۋستراليانىڭ دا كورەي تۇبەگى ماسەلەسىندەگى مايدانى ءبىر. تەك اقش پرەزيدەنتى دونالد ترامپ سولتۇستىك كورەياعا قارسى اسكەري ءىس-ارەكەت الىپ بارۋعا بىرنەشە رەت وقتالۋى ءوڭىردىڭ عانا ەمەس الەمنىڭ بەيبىتشىلىگىنە تونەتىن قاتەردىڭ سالماعىن ارتتىرا ءتۇستى. بىراق، كورەي تۇبەگى قايشىلىعى مەن سولتۇستىك كورەيانىڭ يادرولىق ماسەلەلەرىن بەيبىت جولمەن شەشۋدى قولدايتىن ەلدەر دە كوپ.

“The Qazaq Times”