اقش پرەزيدەنتى دونالد ترامپ. فوتو: 112.ua

اقش-تاعى پرەزيدەنت سايلاۋى كەزىندە رەسەيدىڭ قاتىسىمەن  Facebook-تا جاريالانعان پوستتاردى 126 ملن ادام وقىعان. وسىنداي اقپارات تاراتقان Facebook كومپانياسى رەسەيمەن بايلانىسى انىقتالعان ازاماتتاردىڭ 2016 جىلعى اقش-تاعى پرەزيدەنت سايلاۋىنا دەيىنگى جانە ودان كەيىنگى ۋاقىتتا 80 مىڭعا جۋىق پوست جاريالانعانىن انىقتادى. بۇل تۋرالى ۆۆس اقپاراتتىق اگەنتتىگى جازدى. 

الەۋمەتتىك جەلىدەن تابىلعان 80 مىڭ پوست 2015 جىلدىڭ ماۋسىمى مەن 2017 جىلدىڭ تامىز ايلارى ارالىعىندا كرەملگە جاقىن رەسەي كومپانيالارىنىڭ اتىنان جاريالانعان. ولاردىڭ باسىم بولىگى الەۋمەتتىك جانە ساياسي ىرىتكى سالۋعا باعىتتالعان.

رەسەي وسىعان دەيىن دە اقش-تاعى پرەزيدەنت سايلاۋىنا قاتىسى جوقتىعىن ايتقان ەدى. دونالد ترامپ تا ماسكەۋمەن بايلانىسى بارىن جوققا شىعارىپ كەلدى. امەريكاداعى پرەزيدەنت سايلاۋى بويىنشا تاۋەلسىز زەرتتەۋ جۇرگىزگەن روبەرت ميۋللەردىڭ باستاماسىمەن دونالد ترامپتىڭ سايلاۋ كامپانياسىنا كومەكتەسكەن ەكى ازاماتقا ايىپ تاعىلدى. اقش-تىڭ قازىرگى پرەزيدەنتىنىڭ جاقىن كومەكشىلەرىنىڭ تاعى ءبىرى وسى دۇيسەنبى كۇنى وسىدان بۇرىن جالعان مالىمەت بەرگەنىن جاريالاپ، كىناسىن مويىندادى. ونىڭ وسىعان دەيىن رەسەيگە قاتىسى بار تۇلعالارمەن كەزدەسكەنى انىقتالعان بولاتىن. ول بۇل كەزدەسۋلەرىنىڭ جەكە ماقساتتا ءارى دونالد ترامپتىڭ جۇمىس توبىنا قوسىلماي تۇرىپ بولعانىن ايتقان ەدى. ال ەندى پرەزيدەنتتىڭ بۇرىنعى كومەكشىسى كەزدەسۋلەردىڭ دونالد ترامپتىڭ سايلاۋ الدى كامپانياسى كەزىندە بولعانىن مالىمدەگەن.

“The Qazaq Times”