بۇۇ حيميالىق شابۋىلدى باشار اساد بيلىگى جاساعانىن مالىمدەدى

بىرىككەن ۇلتتار ۇيىمى ءسۇريا جەرىندە حيميالىق قارۋ قولدانۋ ءىسى تۋرالى ءوزىنىڭ قورىتىندى بايانداماسىن تاراتتى. باياندامادا حيميالىق شابۋىل جاساۋشى باشار اسادتقا قاراستى ۇكىمەتتىك كۇشتەر ەكەنىن مالىمدەدى. بۇل تۋرالى «WSJ» باسىلىمىنىڭ رەسمي سايتى حابارلاپ وتىر.

80-نەن اسا ادام قازا بولعان بۇل شابۋىلدان ەلدىڭ وڭتۇستىك-باتىس اۋماعىنداعى حان-شەيحۋن ايماعىنىڭ تۇرعىندارىنىڭ دەنساۋلىعىنا ايتارلىقتاي كەرى اسەرىن تيگىزگەن. بايانداما اۆتورلارى باشار اساد بيلىگىمەن ونى قولداۋشى رەسەي كۇشتەرى شابۋىلدى جاسىرىن تۇردە جۇزەگە اسىرعانىن ايتادى.

ەلدەگى وپپوزيتسيالىق كۇشتەرى جانە باتىس ايماعىنداعى جەرگىلىكتىلەر باشار اسادقا تاۋەلدى ۇكىمەت كۇشتەرى حيميالىق قارۋ تيەلگەن بومبالاردى تاستاعانىن راستاپ وتىر. ءيدليبتىڭ مەديا ورتالىعىندا جۇمىس ىستەيتىن حۋسەين كايال تاڭعى 06:35 شاماسىندا بومبا تاستالعان جەرگە جەتىپ ۇلگەرگەن. بۇل ماڭنان حۋسەين حيميالىق بومبانىڭ قالدىقتارىن بايقالماعانىن، الايدا جەردە سۇلاپ جاتقان ادامداردى كورگەنىن ايتادى.

الەمدى ءدۇر سىلكىندىرگەن بۇل حيميالىق شابۋىلدا زارين گازى قولدانىلعان. زارين گازى ەڭ قاۋىپتى حيميالىق زات. ونىڭ زاقىمداۋ قۋاتى تسيانيدتەن 20 ەسە كۇشتى. زارين گازىمەن جاناسىپ، ونى تىنىس جولىنا جىبەرىپ العان ادامدار بىرنەشە مينۋتقا جەتپەي قايتىس بولادى. اۋاعا تەز تارايتىندىقتان ونىڭ زاردابى مەن مولشەرىن انىقتاپ ۇلگەرۋ قيىننىڭ قيىنى.

بۇۇ-نىڭ مالىمەتىنەن كەيىن اقش-تىڭ بۇۇ-داعى وكىلدەرى بۇل ىسكە باسا نازار اۋداردى. ولار: «ءبىز وسىعان دەيىن شىندىق دەپ سەنىپ كەلگەندەرىمىزدى بۇل بايانداما تەرىسكە شىعاردى. ءبىز بۇل ارەكەتتى سوڭىنا دەيىن سۇرايتىن بولامىز»، – دەستى.

“The Qazaq Times”