فوتو: راديو ازاتتىك

قازاقستان پرەمەر-ءمينيسترى باقىتجان ساعىنتاەۆ قىرعىز كەدەن قىزمەتىن قاتاڭ سىنعا الدى.

قازاق پرەمەر-ءمينيسترىنىڭ سوزىنشە، قازاقستان وسىعان دەيىن دە قىرعىز كەدەن قىزمەتى ءتيىستى دەڭگەيدە جۇمىس ىستەمەيتىندىگىن ايتقان جانە وسى جولعى قازاق-قىرعىز شەكاراسىندا بولعان داۋدىڭ شىعۋىنا باستى سەبەپكەر قىرعىزستان تاراپى. ويتكەنى وسى ۋاقىتقا دەيىن قىرعىز بيلىگى ەاەو ەلدەرىنىڭ وزگە مۇشەلەرىنە كەدەن قىزمەتى بويىنشا جالعان اقپارات بەرىپ كەلگەن. وعان دالەل رەتىندە ساعىنتاەۆ مىرزا سوڭعى جىلدارداعى ستاتيستيكالىق مالىمەتتەردى مىسالعا كەلتىردى.

باقىتجان ساعىنتاەۆتىڭ پىكىرىنشە، قىرعىزستان بيلىگى 2015 جانە 2017 جىلدارى ارالىعىنداعى قىتايمەن اراداعى ساۋدا اينالىمىنىڭ قۇنىن ەاەو ەلدەرىنە ءۇش ەسە تومەن ەتىپ كورسەتكەن. قىتاي تاراپى بەرگەن ستاتيستيكالىق مالىمەتتەر بويىنشا، 2015 جىلى قىتايدان قىرعىزستانعا قۇنى 4,3 ملرد دوللاردى قۇرايتىن تاۋار كىرگەن. بىراق قىرعىز كەدەن قىزمەتى ەاەو ەلدەرىنە بۇل كورسەتكىشتى 1 ملرد دوللار دەپ كورسەتكەن. ال 2016 جىلى قىتاي كەدەنىنىڭ ەسەبى بويىنشا، «ەكسپورت قىتاي – يمپورت قىرعىزستان» باعىتىنداعى تاۋار اينالىمى 5,6 ملرد دوللار بولعان. بۇل جەردە دە قىرعىز كەدەن قىزمەتى ەاەو ەلدەرىنە جالعان اقپارات بەرىپ، قىتايدان كەلەتىن يمپورت كولەمىن 1,5 ملرد دوللار دەپ كورسەتكەن.

ءبىر سوزبەن ايتقاندا ەگەردە ساعىنتاەۆ مىرزا كەلتىرگەن ستاتيستيكالىق مالىمەتتەر راس بولاتىن بولسا، وندا قىرعىزستان بيلىگى وسى ۋاقىتقا دەيىن قازاق-قىرعىز شەكاراسىنداعى جەڭىلدىكتەردى پايدالانىپ، ەاەو ەلدەرى مەن قىتاي اراسىندا دەلدالدىقپەن اينالىسىپ كەلگەن.

“The Qazaq Times”