تيللەرسوننىڭ ساپارى ءۇندىستان مەن اقش قارىم-قاتىناسىن نىعايتتى

اقش مەملەكەتتىك حاتشىسى رەكس تيللەرسوننىڭ ۇندىستانعا ساپارى كەزىندە اقش پەن ءۇندىستان ەكىجاقتى ىنتىماقتاستىقتى نىعايتۋعا، ايماقتىق قاۋىپسىزدىكتى قامتاماسىز ەتۋگە جانە باسقا ەلدەردىڭ تەرروريستتەرگە قارسى كۇرەسىنە قولداۋ بەرۋگە ۋاعدالاستى. بۇل تۋرالى «The Wall Street Journal» باسىلىمى حابارلادى.

ءۇندىستان سىرتقى ىستەر ءمينيسترى سۋشما سۆارادج اقش پەن ءۇندىستان بىرلەسە وتىرىپ اۋعانستانمەن ايماقتىق تۇراقتىلىقتى نىعايتۋعا باعىتتالعان كەلىسسوزدەر جۇرگىزۋدى جوسپارلاپ وتىرعانىن مالىمدەدى. سونىمەن بىرگە قۇراما شتات پەن ءۇندىستان تاراپتارى پاكىستاننىڭ ەل تەرريتورياسىندا تەرروريستەرگە باسپانا بەرۋىن شۇعىل تۇردە توقتاتۋعا كۇش سالۋعا كەلىسكەن.

اقش پەن ءۇندىستان تاراپتارىنىڭ مالىمەتىنە سەنسەك، پاكىستان جاق اۋعانستان جانە وزگە دە كورشىلەس ەلدەرگە شابۋىل جاساپ وتىرعان تەررورلىق توپتاردىڭ پانالاۋىنا ورىن بەرىپ، ولاردىڭ تەرروريستىك ارەكەتتەرىنە قولداۋ بەرىپ وتىر. الايدا، بۇل ايتىلعانداردى پاكىستان ۇكىمەتى جوققا شىعارعان بولاتىن.

سارسەنبى كۇنى وتكەن كەلىسسوزدەردە ءۇندى مۇحيتىنىڭ سۋ الابىن قورعاۋدا ءۇندىستاننىڭ ءرولىن بارىنشا ارتتىرۋدى، بۇل ءۇشىن اتالعان ەلگە وزىق اسكەري قارۋ-جاراق بەرۋ تۋرالى تالقى بولعان. وعان قوسا، ءۇندىستاننىڭ جاپونيا سەكىلدى ازيالىق وداقتاس ەلدەرمەن بولعان قارىم-قاتىناسىن ءتىپتى دە نىعايتا ءتۇسۋ تاقىرىپتارى ءسوز بولعان.

“The Qazaq Times”