فيليپپين ارمياسى مالاۆي قالاسىن ازات ەتتى

ءفيليپپيننىڭ جەرگىلىكتى ۋاقىتىمەن 17 قازان 13:46 شاماسىندا، ەل پرەزيدەنتى نوسەرلى جاۋىنعا قاراماستان رەسمي مالىمدەمە جاساپ، مالاۆي قالاسىنىڭ لاڭكەستەردەن ازات بولعانىن حابارلادى. بۇل تۋرالى اقش-تىڭ Sinovision Net اقپاراتتىق سايتى جازدى.

بەس ايعا سوزىلعان قيانكەسكى  شايقاس ارقىلى ءفيليپپيننىڭ ۇكىمەت ارمياسى   «يسلام مەملەكەتى» تەررورلىق توبىنان ەلدىڭ وڭتۇستىگىندەگى مينداناو ارالىنا ورنالاسقان مالاۆي قالاسىن قايتارىپ الدى.

16 قازان كۇنى شينەيكدە ءفيليپپيننىڭ قورعانىس ءمينيسترى لورەنتسو مالىمدەمە جاريالاپ، سول كۇنى تاڭدا ۇكىمەت ارمياسى  مالاۆي قالاسىن بەس اي بويى قورشاپ العان لاڭكەستىك ۇيىمنىڭ اتاماندارى يسيس لوڭ حاپيرون جانە ۋمار ءمۋددى اتىپ ولتىرگەنىن ايتقان. ءارى دنق ساراپتاماسى ارقىلى ولاردىڭ مۇردەلەرى ناقتى انىقتالعانىن العا تارتتى.

پوليتسيا تاراۋلارىنىڭ رەسمي دەرەگىنە قاراعاندا، حاپيرون ازياداعى ەڭ قاۋىپتى دەپ تانىلعان تەرروريستىڭ ءبىرى. ول 2001 جىلى بىرنەشە اقش ازاماتىن بارىمتالاپ، بىرەۋىن ولتىرگەن. وسىدان كەيىن ول اقش جاعىنان تەرروريست رەتىندە ىزدەستىرىلىپ، ونى تۇتقىنداعاندارعا 5 ميلليون اقش دوللار كولەمىندە سىياقى بەرىلەتىنىن جاريالاعان.

ۇكىمەت اسكەرلەرى تۇتقىنداردى امان الىپ شىعۋ ءۇشىن كۇش سالعان. الايدا، قاقتىعىستىڭ قيانكەسكى بولعانى سەبەپتى، تەك تۇتقىنداعى 16 ايەلدى قۇتقارا العان. قۇتقارۋ كەزىندە 20-دان استام ادام جارالانعان. سودىرلاردىڭ قولىنان امان شىققاندار اسكەريلەرگە  ماڭىزدى مالىمەتتەردى جەتكىزىپ بەرگەن.اقش پەن اۋستراليا قارۋلى كۇشتەرى دە فيليپپين قوسىندارىنا قولداۋ كورسەتكەنى تۋرالى مالىمەت بار.

5 ايعا سوزىلعان قاقتىعىستا مالاۆي قالاسىنىڭ كوپتەگەن قۇرىلىستارى بۇلىنگەن. باستاپقى ەسەپكە قاراعاندا، قالانى قالپىنا كەلتىرۋگە كەمىندە 100 ميلليون اقش دوللارى كەتەدى دەپ بولجانۋدا.

بيىل مامىر ايىنان بەرى قاقتىعىستان  كوز جۇمعان قارۋلىلاردىڭ سانى 1000-نان اسقان. ولاردىڭ ىشىندە 822 ادامى تەررورلىق توپ مۇشەلەرى بولسا، 162-ءسى ۇكىمەت ارمياسىنىڭ ساربازدارى مەن پوليتسيا قىزمەتكەرلەرى. جازىقسىز بۇقارالاردان دا بىرنەشە ون ادام قازا تاپقان.

ادىلەت احمەتۇلى

“The Qazaq Times”