كيركۋكتەگى قاقتىعىس. فوتو: WSJ.

يراكتا بولعان ۇكىمەت ارمياسى مەن كۇردتەردىڭ قاقتىعىسى، ياعني وڭىردەگى «يسلام مەملەكەتىنە» قارسى كۇرەستەگى ەكى سەنىمدى وداقتاسىنىڭ اراسىنداعى قايشىلىق اقش ۇكىمەتىن الاڭداتىپ وتىر. بۇل تۋرالى «WSJ» باسىلىمىنىڭ سايتىندا جازىلدى.

يراك پرەمەر-ءمينيسترى حايدەر ءال-ابادي دۇيسەنبى كۇنى تاڭەرتەڭ فەدەرالدى اسكەري كۇشتەر كيركۋك پروۆينتسياسىنا كىرۋگە بۇيرىق بەرگەن. كۇردتەردىڭ «پەشمەرگا» قارۋلى كۇشتەرى سۋننيتتەردەن ءۇش جىل ىشىندە باسىپ العان ايماعىندا، ەندى يراك ۇكىمەت ارمياسى مەن كۇرد قارۋلى كۇشتەرى تەكە-تىرەستە قالدى.

قاقتىعىس باستالعانعا دەيىن، جارتىلاي اۆتونوميالى بيلىكتەگى كۇرد ايماعى باعدات بيلىگىنىڭ قارسىلىعىنا قاراماستان تاۋەلسىزدىك الۋ تۋرالى رەفەرەندۋم جاريالاعان ەدى. بۇل رەفەرەندۋم تۋرالى يراك ۇكىمەتى اقش پەن بىرلەسە وتىرىپ، ەلدەرى «يسلام مەملەكەتى» كۇشتەرىنە قارسى كۇرەسكە كەدەرگى كەلتىرەتىنى تۋرالى ايتقان بولاتىن.

اقش تارابى قازىرگە دەيىن «يم» كۇشتەرىنە قارسى كۇرەس ءۇشىن يراك ۇكىمەتى مەن كۇرد جاساقتارىنا بىردەي قولداۋ بەرىپ كەلگەن. الايدا، قازىرگى جاعدايدان الىپ قاراعاندا بۇل شەشىمنىڭ كەمشىلىكتەرى انىق كورىنىپ جاتىر. ايتالىق، ەكى قارۋلى كۇش اراسىندا ناقتى ءبىتىم بولماعان جاعدايدا ەكى جاققا بىردەي قولداۋ كورسەتۋ يراكتىڭ ىشكى سوعىسىن ءتىپتى دە ورشىتە تۇسپەك.

“The Qazaq Times”