كاتاردىڭ ءامىرى مالايزياعا نە ءۇشىن باردى؟

اراب مەملەكەتتەرىنىڭ تاراپىنان سىنعا ۇشىراپ، ديپلوماتيالىق داعدارىسقا تۇسكەن كاتاردىڭ ءامىرى شەيح تاميم بين حاماد ءال-تاني مينيسترلەر كابينەتى جانە كاسىپكەرلىك وكىلدەرىن باستاپ، مالايزياعا ەكى كۇندىك جۇمىس ساپارىمەن باردى. مالايزياعا جەكسەنبى كۇنى ات باسىن تىرەگەن كاتار ءامىرى مالايزيا باسشىلارىمەن ەكونوميكا، ەنەرگەتيكا جانە ينۆەستيتسيا سالالارىندا كەلىسسوز جۇرگىزەدى. 

وسى ورايدا كاتار-مالايزيا قاتىناستارىنا قىسقاشا شولۋ ۇسىنامىز:

الەم چەمپيوناتى

• كاتار 2022 جىلى فۋتبولدان الەم چەمپيوناتىن وتكىزەتىنى بەلگىلى. وسىعان وراي كاتار جاڭادان لۋسايل دەگەن اتپەن قالا تۇرعىزىپ، 8 سپورت الاڭى مەن تەمىر جول جەلىلەرىن سالىپ جاتىر. قۇرىلىسقا قاجەتتى ماتەريالداردى ساۋد ارابياسىنان الىپ وتىرعان كاتار ديپلوماتيالىق داعدارىستان كەيىن، قاجەتتىلىكتەرىن مالايزيانىڭ تاۋارىمەن الماستىرىپ وتىر;
• كاتاردا قوناي ءۇي مەن تۋريزم سالاسىندا 15 مالايزيالىق كومپانيا جۇمىس ىستەيدى;
• مالايزيا پرەمەر-ءمينيسترىنىڭ ورىنباسارى احمەد حاميدي اقپان ايىنداعى كاتارعا ساپارى بارىسىندا الەم چەمپيوناتى ينفراقۇرىلىمىن جاساقتاۋعا مالايزيالىق كومپانيالار قاتىساتىنىنان ءۇمىتتى ەكەنىن ءبىلدىردى;

ساۋدا

• 2011 جىلى كاتار مەن مالايزيا 2 ملرد اقش دوللارىنان تۇراتىن ورتاق ينۆەستيتسيالىق قور قۇردى;
• مالايزيانىڭ جەرگىلىكتى اقپارات قۇرالدارىنىڭ دەرەگىنە سايكەس، ەكى ەل اراسىنداعى ساۋدا اينالىمى 2016 جىلى 566 ملن دوللاردى قۇراعان. كاتاردىڭ اقپاراتتىق اگەنتتىكتەرى قازىر قوس تاراپتىڭ اراسىنداعى ساۋدا 1,1 ملرد دوللارعا جەتكەنىن ايتادى;
• كاتار مالايزيادان ەلەكتر قۇرىلعىلارى، مەتالل جانە اعاش ونىمدەرى، كولىك ساتىپ الادى;
• كاتار مالايزياعا مۇناي، جەڭىل ونەركاسىپ جانە حيميا ونىمدەرىن ساۋدالايدى.

كاتار امىرىنەن بۇرىن مالايزياعا اقپان ايىنىڭ سوڭىندا ساۋد ارابياسىنىڭ كورولى كەلگەن ەدى. مالايزيا ساۋد ارابياسى جانە كاتارمەن قاتار ارىپتەستىك قارىم-قاتىناستاردى ۇستانادى. پارسى شىعاناعىندا ورىن العان ديپلوماتيالىق داعدارىسقا قاتىستى مالايزيانىڭ پرەمەر-ءمينيسترى: ء"بىز اللادان اراب مەملەكەتتەرىنىڭ اراسىندا تۋىنداعان قايشىلىقتاردىڭ جويىلۋىن سۇرايمىز. بۇرىنعى بەيبىتشىلىك پەن تۇراقتىلىق قايتا قالپىنا كەلەدى دەپ ءۇمىت ەتەمىز", - دەگەن بولاتىن.

“The Qazaq Times”