ەردوعان اقش-قا نەگە وكپەلى؟

تۇركيا پرەزيدەنتى رەجەپ تايىپ ەردوعان اقش-تىڭ  انكارامەن قارىم-قاتىناسىن ءۇزىپ الۋ تاۋەكەلىنە بارىپ وتىرعانىن ايتتى. ول امەريكامەن ارادا تۋىنداعان ۆيزاعا بايلانىستى كەلىسپەۋشىلىكتەرگە اقش-تىڭ انكاراداعى كونسۋلدىعى قىزمەتكەرىن كىنالادى. بۇل تۋرالى APF اقپاراتتىق اگەنتتىگى جازدى. 

رەجەپ تايىپ ەردوعان: "امەريكا ءوزىنىڭ ناتو-داعى تۇركيا سياقتى ارىپتەسىمەن قارىم-قاتىناسىن ءبىر ديپلوماتقا بولا ءۇزىپ العانى دۇرىس بولمادى", - دەگەن پىكىر ءبىلدىردى.

ەستەرىڭىزگە سالا كەتەيىك، وسىدان بۇرىن تۇركيا اقش-تىڭ انكاراداعى كونسۋلدىعىنىڭ تەگى تۇرىك قىزمەتكەرىن فەتحۋللاح گيۋلەنمەن بايلانىسى بار دەگەن ايىپپەن تۇتقىنداعان بولاتىن. امەريكا بۇعان جاۋاپ رەتىندە تۇركيا ازاماتتارىنا يمميگراتسيالىق ەمەس ۆيزالاردى بەرۋدى توقتاتتى. تۇركيا ءدال وسىنداي قاداممەن جاۋاپ قاتتى.

اقش ءوزىنىڭ ەلشىسى تولىقتاي امەريكانىڭ تاپسىرمالارىن عانا ورىنداعانىن العا تارتىپ، ونىڭ ايىپتى ەكەندىگىنە سەنبەيدى. وسىدان بۇرىن اقش-تىڭ اۋعانستانداعى ەلشىسى بولىپ تاعايىندالعان ديپلومات وسى اپتانىڭ سوڭىندا تۇركيادان كەتۋى كەرەك.

رەجەپ تايىپ ەردوعان ءوزىنىڭ جوعارىدا بەرىلگەن مالىمدەمەسىنە: "الپاۋىت امەريكا ءبىر ەلشىنىڭ الدىندا قۇرداي جورعالادى" دەگەن كەكەسىن ءبىلدىردى. سونداي-اق مەملەكەت باسشىسى تۇركيانىڭ پوليتسيا قىزمەتكەرلەرى بۇدان بىلاي اقش وندىرگەن تاپانشالاردى قولدانبايتىنىن جەتكىزدى.

تۇركيا دونالد ترامپ تۇسىندا امەريكامەن قارىم-قاتىناسى جاڭا دەڭگەيگە كوتەرىلەدى دەپ كۇتكەنىمەن، اقش-تىڭ سۇرياداعى كۇرد توپتارىنا قولداۋ ءبىلدىرۋى مەن فەتحۋللاح گيۋلەندى ەكستراديتسيالاۋدان باس تارتۋى ناتو-لىق ارىپتەسىنىڭ كوڭىلىن قالدىردى.

“The Qazaq Times”