فوتو: Oxu.az

تۇركيا اسكەرى ءسۇريانىڭ يدليب قالاسىنا كىردى – دەپ حابارلايدى Oxu.az اقپارات كوزى.

شەتەلدىك باق وكىلدەرىنىڭ مالىمەتىنشە، رەسمي انكارا بۇعان دەيىن تۇركيانىڭ حاتاي پروۆينتسياسىندا تۇرعان اسكەرىن ءسۇريانىڭ يدليب قالاسىنا كىرگىزگەن. بۇدان ءبىراز ۋاقىت بۇرىن تۇركيا اسكەرىنىڭ باس شتابى ەل اسكەرى يدليب قالاسى ماڭىندا بارلاۋ جۇمىستارىن وتكىزگەندىگى جايىندا اقپارات تاراتقان. ال تۇركيا پرەمەر-ءمينيسترى بينالي يىلدىرىم انكارا يدليب قالاسى ماڭىنداعى بارلىق اسكەري وپەراتسيالارىن استانا كەلىسىمى بويىنشا جۇرگىزىپ جاتقاندىعىن ايتقان.

ەستەرىڭىزگە سالايىق، استانادا وتكەن ءسۇريا داعدارىسىنا بايلانىستى كەلىسسوزدەردە يران، تۇركيا، رەسەي ەلدەرى ءسۇريا ايماعىنداعى ءتورت دەەسكالاتسيالىق ايماقتىڭ ءبىرى يدليب قالاسى بولادى دەپ كەلىسكەن بولاتىن. ال ماسكەۋ مەن انكارا يدليب قالاسىنىڭ ىشكى قاۋىپسىزدىگىن تۇركيا، ال سىرتقى قاۋىپسىزدىگىن رەسەي اسكەرلەرى قامتاماسىز ەتەدى دەپ ۋاعدالاسقان.

“The Qazaq Times”