مادۋرو: ترامپقا راحمەت، ول مەنى الەمگە تانىمال ەتتى

ۆەنەسۋەلا پرەزيدەنتى نيكولاس مادۋرو امەريكا قۇراما شتاتىنىڭ پرەزيدەنتى دونالد ترامپقا راحمەت ايتتى. مادۋرو سوزىندە: «ترامپ مەنى الەمگە تانىمال ەتتى»، – دەدى. بۇل تۋرالى «شينلاڭ» اقپاراتتىق سايتى جازدى.

ۆەنەسۋەلاداعى جاعدايعا بايلانىستى ترامپ وسىعان دەيىن مادۋرونىڭ ارەكەتتەرىنە كوبىرەك سىن-پىكىر بىلدىرگەن ەدى. نيكولاس مادۋرو ءوز كەزەگىندە: «ترامپ مەنى سىناپ-مىنەپ الەمگە تانىمال ەتتى. بۇل ءۇشىن وعان راحمەت ايتام. ول مەنى ءاردايىم سىناعان سايىن ەل مەنى جاقسى كورە باستايدى. دەمەك، مەن ءبارىن دۇرىس جاساپ وتىرمىن»، – دەدى.

مادۋرو ترامپتى «ۆەنەسۋەلانىڭ وپپوزيتسيا باسشىسى» دەپ اتادى. دەگەنمەن ول «يمپەريا باسشىسىنىڭ» ءوزىن ءار رەت سوزىنە كىرىستىرگەنىن «ماقتانىش» دەپ قابىلدايتىنىن ءبىلدىردى.

ۆەنەسۋەلا باسشىسى وسىدان بۇرىن لاتىن امەريكاسىنداعى جانە اقش قاتارلى ەلدەردىڭ بىرقاتار قىسىمدارىنا تاپ بولىپ، تۇركيا، رەسەي، قىتاي قاتارلى ازيا ەلدەرىمەن ىنتىماقتاستىقتى بەكەمدەۋ قادامدارىن جاساعان بولاتىن.

“The Qazaq Times”