كاسپەرسكي دەرەكتەردى ۇرلاۋشى بولۋى مۇمكىن. فوتو: The Hacker News.

اقش-تىڭ بۇرىنعى جانە قازىرگى ۇكىمەتىنىڭ وكىلدەرى مالىمدەگەندەي، رەسەي الەمدىك كومپيۋتەر جەلىلەرىنە سۇعاناقتىق جاساپ وتىر، ءارى وعان تانىمال انتيۆيرۋستىق باعدارلاما كاسپەرسكيدى پايدالانادى. سول ارقىلى رەسەي جاق اقش ۇكىمەتىنىڭ قۇجاتتارى مەن قۇپيا ماتەريالدارىن ۇرلاۋعا تىرىسىپ كەلەدى. بۇل تۋرالى «The Wall Street Journal» باسىلىمى حابارلادى.

اتالعان انتيۆيرۋس باعدارلامالىق جاساقتاماسى ماسكەۋدە ورنالاسقان «كاسپەرسكي زەرتحاناسىندا» (AO Kaspersky Lab) دايىندالادى. بۇل باعدارلامانىڭ جۇمىس ءتارتىبى تۇسىنىكتى – ۆيرۋستار مەن باسقا دا زياندى باعدارلامالاردى انىقتاۋ ءۇشىن باعدارلامالىق جاساقتاما ورناتىلعان كومپيۋتەردى ۇنەمى سكانەرلەيتىن بولادى. سول ارقىلى باعدارلاما كومپيۋتەرلىك جەلىلەردەن قۇپيا ماتەريالداردى جينايدى جانە اقش ۇكىمەتىنىڭ قۇپيا «مەملەكەتتىك قۇپيا قۇجاتتارىنا» شابۋىلداپ كىرەدى.

وسىدان بۇرىن اقش بارلاۋ اگەنتتىكتەرى رەسەيلىك اتالعان كومپتەرلىك باعدارلامانى مەملەكەتتىك مەكەمەلەردە قولدانۋعا شەكتەۋ قويدى. سونداي-اق، اقش ۇلتتىق قاۋىپسىزدىك اگەنتتىگىنىڭ (NSA) قۇپيا دەرەكتەرىن ۇرلاعانى ءۇشىن قۇراما شتات كولەمىندە كاسپەريسكيدىڭ قىزمەتىنە توسقاۋىل قويدى. اقش ۇكىمەتىنىڭ رەسمي وكىلدەرى رەسەيدىڭ كاسپەرسكي باعدارلامالارىنان پايدالانىپ، كوبىندە اقش-تى نىساناعا العان «ۇرلىق» جاسايتىنىن اشىق ايتتى.

دەگەنمەن، كاسپەرسكي كومپانياسىنىڭ اتقارۋشىلارى بۇل ايتىلعانداردى تەرىسكە شىعارىپ وتىر.

“The Qazaq Times”