فوتو: bbc.com

رەسەيدىڭ TASS اقپاراتتىق اگەنتتىگى سولتۇستىك كورەيانىڭ سىرتقى ىستەر ءمينيسترىنىڭ مالىمدەمەسىنە سىلتەمە جاساپ، "اقش كحدر-عا قارسى سوعىس ءورتىن تۇتاتتى" دەگەن حابارلاما تاراتتى. رەسەيلىك TASS-قا سۇحبات بەرگەن لي يون حو دونالد ترامپتىڭ بۇۇ-نىڭ باس اسسامبلەياسىندا سويلەگەن ءسوزىن نەگىزگە العان. بۇل تۋرالى CNN اقپاراتتىق اگەنتتىگى جازدى. 

سولتۇستىك كورەيانىڭ يادرولىق قارۋ سىناقتارىن وتكىزۋىنە بايلانىستى ورناعان قيىن قارىم-قاتىناستار اقش پرەزيدەنتى مەن كحدر رەسمي بيلىك وكىلدەرىنىڭ اراسىندا ءبىر-بىرىنە "سالەمدەمەلەر" جولداۋمەن جالعاسىپ، ء"سوز سوعىسىنا" ۇلاسىپ ەدى. بۇۇ-نىڭ باس اسسامبلەياسىنىڭ جيىنىندا دونالد ترامپ سولتۇستىك كورەيانى تولىقتاي جويىپ جىبەرۋگە ىقىلاس ءبىلدىرىپ، ونىڭ باسشىسىن "زىمىران ادام" دەپ اتادى.

سولتۇستىك كورەيانىڭ سىرتقى ىستەر ءمينيسترى لي يون حو: "دونالد ترامپ بۇۇ-داعى باسقوسۋدا ءوزىنىڭ اشۋلى كەلبەتىمەن سوعىستىڭ ءورتىن تۇتاتتى" - دەگەن پىكىر ءبىلدىردى. رەسمي وكىل ءسوزىن ارى قاراي بىلاي جالعادى: "اقش ءوزىن بۇكىل الەمنىڭ الدىندا ماسقارالاعىسى كەلمەسە، اقىلعا سالىپ، بىزگە تيىسكەنىن قويۋى كەرەك. ءبىزدىڭ حالقىمىز امەريكا سياقتى اگرەسسور مەملەكەتتى جازاسىز قالدىرمايدى!".

كەشە دونالد ترامپ كانادانىڭ پرەمەر-ءمينيسترى دجاستين تريۋدومەن كەزدەسۋ بارىسىندا: "باسقالاردىڭ پىكىرىن  تىڭداسام، مەنىڭ سولتۇستىك كورەياعا دەگەن قارىم-قاتىناسىم وزگەشە ەكەنىن تۇسىنەمىن. مەن اينالامداعىلاردىڭ ءبارىنىڭ ويىن ەسكەرەمىن، بىراق تۇپتەپ كەلگەندە سولتۇستىك كورەياعا قاتىستى مەنڭ قارىم-قاتىناسىم  قالاي بولعانى ماڭىزدى ەمەس پە؟" دەدى.

TASS اقپاراتتىق اگەنتتىگى ءجۋرناليسىنىڭ "اقش پەن سولتۇستىك كورەيا اراسىندا كەلىسسوزدەر بولۋى مۇمكىن بە؟" دەگەن سۇراعىنا لي يون حو: "قازىرگى اقش-تىڭ سولتۇستىك كورەياعا قارسى سانكتسيالار جاريالاپ، ۇنەمى قىسىم كورسەتىپ ءارى سوعىس قاۋپىن ءتوندىرىپ وتىرعان كەزى كەلىسسوزدەر جۇرگىزۋگە قولايلى ءسات دەپ ويلامايمىن", - دەپ جاۋاپ بەردى.

“The Qazaq Times”