دوللار كۋرسى ءبىر جىلداعى ەڭ جوعارعى كورسەتكىشكە جەتتى

قازاقستان قور بيرجاسىندا بولعان تاڭعى سەسسيا كەزىندە ۇلتتىق ۆاليۋتانىڭ دوللارعا قاتىستى باعامى 345 تەڭگەگە دەيىن السىرەدى. 

5 قازان كۇنگى تاڭعى سەسسيا قورىتىندىسى بويىنشا دوللار كۋرسى 344,88 تەڭگەنى قۇرادى. ساۋدا كولەمى 12,8 ملن دوللارعا دەيىن جەتتى. سەسسيا كەزىندە دوللار كۋرسى  345,37 تەڭگەگە دەيىن قىمباتتاپ، سەسسيانىڭ جابىلۋ كەزىندە دە وسى دەڭگەيىن ساقتادى.

دوللاردىڭ مۇنداي ماكسيمۋم كورسەتكىشى وسى جىلى تىركەلمەگەن. سوڭعى رەت جوعارعى كورسەتكىش 2016 جىلدىڭ قاراشا ايىندا بولعان. وسىلايشا بۇل وسى جىلعى ماكسيمۋم دەڭگەي بولىپ وتىر.

Kurs.kz سايتىنىڭ مالىمەتىنشە، الماتى جانە استانا قالالارىندا دوللار 346-346,5 تەڭگە ارالىعىندا ساتىلىپ جاتىر.

ايتا كەتەيىك، بۇدان بۇرىن ۇلتتىق بانك توراعاسى دانيار اقىشەۆ  ۇكىمەت وتىرىسىندا ۆاليۋتا باعامىنىڭ بىردەن قۇبىلىپ كەتۋىنە ەش نەگىز جوق ەكەنىن ايتىپ، تەڭگە نىعايىپ، شەتەل ۆاليۋتاسىن ساتىپ الىپ جاتقاندار ۇتىلىپ قالۋى مۇمكىن ەكەنىن مالىمدەگەن ەدى.

“The Qazaq Times”