قۇراما شتات رەسەيدى «جاسىرىن اسكەري قيمىل جاساۋدا» دەپ ايىپتادى

قۇراما شتاتتىڭ رەسمي وكىلدەرى «اشىق كەڭىستىك شارتى» بويىنشا گاۆاي ارالدارىنىڭ كەڭىستىگىنەن شەتەلدىك ۇشاقتارىنىڭ ۇشۋىنا تىيىم سالۋعا دايىندالىپ وتىر. بۇل قادامى رەسەيدىڭ اسكەري قۇپيالىقتاردى جاسىرعانىنا بەرگەن جاۋابى بولىپ سانالادى. بۇل تۋرالى «The Wall Street Journal» باسىلىمى حابارلايدى.

«اشىق كەڭىستىك شارتى» 34 مەملەكەت قول قويعان، ءبىر-ءبىرىنىڭ اشىق كەڭىستىكتەرىندە قارۋسىز شارلاۋ جۇرگىزىپ، اسكەري قادامدار مەن قارۋ جاراقتاردى باقىلاۋعا مۇمكىندىك بەرەتىن حالىقارالىق شارت بولىپ تابىلادى.

سوڭعى كەزدەرى رەسەي بالتىق تەڭىزىندەگى كالينينگراد كەڭىستىگىندە اتالعان شارت بويىنشا بارلاۋ جۇرگىزۋگە شەكتەۋ قويعان. بۇعان اقش تارابى گاۆاي ارالدارىنىڭ كەڭىستىگىنە كىرۋگە شەكتەۋ قويۋ ارقىلى جاۋاپ بەردى. اتالعان كەڭىستىكتە ءار رەتكى ۇشۋ ارالىعى 900 شاقىرىمنان اسپاۋى كەرەك دەگەن بەلگىلەمە شىعارعان. اقش جاق رەسەيدىڭ تىيىم سالىپ وتىرعان ايماقتارىندا جاسىرىن اسكەري قيمىلدار جاساپ وتىر نەمەسە ماڭىزدى قارۋ-جاراقتار جاسىرعان بولۋى مۇمكىن دەپ كۇماندانادى.

قازىرگى كەزدە «اشىق كەڭىستىك شارتى» بويىنشا گرۋزياداعى روبينس اۋە قورعانىسى بازاسىنا جانە وڭتۇستىك داكوتاداعى ەللۆورت اۋە كۇشتەرىنىڭ بازاسىنا شارلاۋ جاساۋ شەكتەلگەن. بۇل ەكى بازا ۇشقىشتار مەن ەكيپاجدار ەكى رەيس اراسىندا دەمالۋعا جانە جانار زات تولىقتىرۋعا پايدالاندى. اقش وكىلدەرى وسى جاڭا شارالاردى ۆەنادا وتكەن «اشىق كەڭىستىك شارتى» بويىنشا كونسۋلتاتيۆتىك كوميتەتتىڭ وتىرىسىندا جاريالادى.

سارسەنبى كۇنى رەسەي سىرتقى ىستەر ءمينيسترىنىڭ ورىنباسارى سەرگەي ريابكوۆ اقش-تىڭ بۇل قادامدارىن سىنعا الدى. ءارى ۋاشينگتوننىڭ بۇل قادامدارى ىنتىماقتاستىققا باعىتتالعان قادام ەمەس ەكەنىن ايتتى. بۇعان رەسەي جاقتىڭ جاۋاپ قايتاراتىنىن، الايدا قانداي شارالاردى قوسىمشا جولعا قوياتىنى تۋرالى مالىمەت بەرمەگەن. رەسەيلىك رەسمي وكىلدىڭ پىكىرىنشە، ماسكەۋ تارابى ءسىبىر اۋە قورعانىسى كۇشتەرى بازاسىن پايدالانۋعا شەكتەۋ قويۋى مۇمكىن ەكەن. بۇل ۇشاقتاردىڭ رەسەيدىڭ قيىر شىعىستاعى اۋە كەڭىستىگىنە كىرۋىنە شەكتەۋ قويۋ دەگەندى بىلدىرەدى ەكەن.

“The Qazaq Times”