تايلاندتىڭ بۇرىنعى پرەمەر ءمينيسترى ينگلاك شيناۆانترا.

تايلاند پوليتسياسى 28 قىركۇيەكتە بۇرىنعى پرەمەر-مينيستر ينگلاكتى تۇتقىنداۋ ءۇشىن، ونى ۇيىنەن ىزدەستىرگەن. الايدا، جاسىرىنىپ جۇرگەن ينگلاك ءوز ۇيىندە بولماي شىققان. سول كۇنى ەلدىڭ پرەمەر-ءمينيسترى پرايۋت چان-وچا مالىمدەمە جاساپ، بۇرىنعى پرەمەر-ءمينيسترىنىڭ دۋبايدا ەكەنىن ايتقان. بۇل تۋرالى «شينحۋانىڭ» رەسمي سايتى جازدى.

بۇل تايلاند بيلىگىنىڭ تامىز ايىنان بەرى ينگلاكتىڭ قايدا ەكەندىگى تۋرالى العاش رەت انىق حابار جاريالاۋى. وسىدان ءبىر كۇن بۇرىن تايلاند جوعارى سوتى ەلدىڭ بۇرىنعى پرەمەرىن سىرتتاي 5 جىلعا باس بوستاندىعىنان ايىرعان ەدى.

تايلاندتىڭ قازىرگى پرەمەر-ءمينيسترى جۋرناليستەرگە بەرگەن مالىمەتىندە، ينگلاكتىڭ دۋبايدا پانالاعانىن سىرتقى ىستەر مينيسترلىگى ارقىلى بىلگەنىن ايتقان.

دەگەنمەن، تايلاند پەن بىرىككەن اراب امىرلىكتەرى اراسىنداعى ەكستراديتسيالاۋ تۋرالى شارت جوق. دۋباي تارابى بولسا تايلاند سىرتقى ىستەر مينيسترلىگىنە ينگلاكتىڭ ەشقانداي ساياسي قادامدار جاساۋىنا مۇمكىندىك بەرمەيتىنىن جەتكىزگەن.

50 جاستاعى ينگلاك قازىر شەتەلدە تۇراتىن، وزىنەن بۇرىن ەلدە پرەمەر بولعان تاكسين شيناۋاترانىڭ قارىنداسى. ينگلاك 2011 جىلى تايلاندتىڭ پرەمەر-ءمينيسترى بولىپ سايلانعان. 2014 جىلى 7 مامىردا، تايلاندتىڭ كونستيتۋتسيالىق سوتى بيلىك وكىلەتتىگىن تەرىس پايدالانۋ ايىبىمەن ول پرەمەر-مينيستر وكىلەتتىلىگىن توقتاتقان. كۇرىش ساتۋ سۋبسيدياسىنا دالاعا شاشىلعان قارجىلاردىڭ باستى جاۋاپكەرى رەتىندە ينگلاك بىرنەشە رەت سوتقا شاقىرتىلعان. الايدا، ول بۇل سوت وتىرىستارىنان جالتارادى. سوڭىندا، ەلدىڭ جوعارى سوتى ونى قۋعىنداۋ بۇيرىعىن شىعاردى. ءبىر ايدان كەيىن ونى سىرتتاي سوتتادى.

“The Qazaq Times”