قىتاي سولتۇستىك كورەياعا مۇناي ساۋدالاۋدى توقتاتادى

قىتاي سولتۇستىك كورەياعا مۇناي تاسىمالىن توقتاتىپ، بۇرىنعى ساۋدا ارىپتەسىنەن جەڭىل ونەركاسىپ ونىمدەرىن ساتىپ الۋدى توقتاتادى. بۇل شەشىم پيوڭياڭنىڭ سوڭعى وتكىزگەن يادرولىق قارۋ سىناقتارىنا بايلانىستى قابىلدانىپ وتىر. بۇل تۋرالى ۆۆس اقپاراتتىق اگەنتتىگى جازدى.

پيوڭياڭنىڭ ەكىنشى ەڭ ءىرى ەكسپورتقا شىعاراتىن تاۋارىنا جاتاتىن جەڭىل ونەركاسىپ ونىمدەرىنە سالىنعان سانكتسيا سولتۇستىك كورەيانىڭ جىلدىق بيۋدجەتىن 700 ملن اقش دوللارىنا قىسقارتادى. ال ەلدەگى ءمۇناي ونىمدەرىنىڭ نەگىزگى كوزى بولىپ وتىرعان قىتايدىڭ شيكىزاتى تاسىمالىنىڭ توقتاتىلۋى ەل ەكونوميكاسىنا اۋىر سوققى بولعالى تۇر. قىتاي سولتۇستىك كورەياعا مۇناي تاسىمالداۋدى مۇلدە توقتاتپايدى، بۇۇ بەلگىلەگەن از مولشەردە عانا ساۋدالايتىن بولادى. بىراق ەكى ەل اراسىنداعى وسىعان دەيىنگى مۇناي تاسىمالىنىڭ كولەمى مەن ونىڭ قانشا پايىزعا ازاياتىنى جونىندە ناقتى اقپارات بەرىلگەن جوق.

APF اقپاراتتىق اگەنتتىگى سوڭعى ەكى ايدا سولتۇستىك كورەياداعى جانارماي باعاسى 20 پايىزعا وسكەنىن حابارلادى. اگەنتتىك تىلشىلەرى كحدر-داعى جانارماي بەكەتى قىزمەتكەرىنىڭ پىكىرىن بەرگەن: "كەشە جانارماي 1.90 $ بولسا، بۇگىن - 2 $. بولاشاقتا جانارماي باعاسى كۇن ساناپ وسەدى دەپ ويلايمىن".

رەسەي مەن قىتاي وسىعان دەيىن اقش-تىڭ سولتۇستىك كورەياعا مۇناي ەكسپورتتاۋدى مۇلدە توقتاتۋ تۋرالى ۇسىنىسىن قولداماي كەلگەن بولاتىن. بىراق سوڭعى ورىن العان قارۋ سىناقتارىنان كەيىن، مۇناي تاسىمالى كولەمىن بەلگىلى ءبىر شەككە دەيىن تومەندەتۋگە كەلىستى.

كحدر وتكەن جىلى قىتايعا قۇنى 1,2 ملرد $ بولاتىن كومىر ەكسپورتتاعان. دەگەنمەن جۋىردا قىتاي سولتۇستىك كورەيادان ساتىپ الاتىن كومىر كولەمىن دە قىسقارتۋ تۋرالى شەشىم شىعاردى.

اتالعان شارالار سولتۇستىك كورەيانى العان باعىتىنان كەيىن قايتارا الاتىنى نە ودان ءارى ىزالاندىراتىنى ءالى بەلگىسىز. بىراق كيم جوڭ ۋن مەن دونالد ترامپ اراسىندا بولعان سوڭعى ء"بىرىن-ءبىرى تىلدەۋ" وپەراتسيالارىنان كەيىن، كحدر باسشىسى اقش پرەزيدەنتىنىڭ ءوز سوزدەرى ءۇشىن وتە قىمبات قۇن وتەۋگە تۋرا كەلەتىنىن ايتقان ەدى. ال رەسەيدىڭ سىرتقى ىستەر ءمينيسترى سەرگەي لاۆروۆ ولاردىڭ ءبىر-بىرىنە جولداعان ادەپتەن الىس سالەمدەمەلەرىن "بالاباقشاداعى بالالاردىڭ ەشكىم توقتاتا المايتىن توبەلەسىنە ۇقسايدى" دەپ باعالادى.

“The Qazaq Times”