فوتو:azeri.today

ارمەنيا بيلىگى كەزىندە باسىپ العان ازەربايجان جەرلەرىنىڭ ءبىراز بولىگىن  ەلگە قايتارىپ بەرۋگە نيەتتى. بۇل تۋرالى «تۇرىك تەلە-راديو» قىزمەتىنىڭ رەسمي سايتى حابارلاپ وتىر.

مالىمدەمەنى ارمەنيا سىرتقى ىستەر ءمينيسترى ەدۋارد نالبانديان ەلدىڭ باس قالاسى ەرەۆاندا وتكەن 6-شى ارميان دياسپوراسى فورۋمى وتىرىستارىندا جاسادى.

نالبانديان: «قاراباح ماسەلەسى شەشىمىن تاۋىپ، ەۋروپاداعى قاۋىپسىزدىك جانە ىنتىماقتاستىق ۇيىمى اياسىندا جالعاسىپ جاتقان كەلىسسوزدەرگە مۇمكىندىك بەرۋ ءۇشىن ءبىز ارميان تارابى قاراباح قاۋىپسىزدىگىنە قاتەر توندىرمەيتىن كەيبىر جەرلەردى ازەربايجانعا قايتارۋىمىزعا بولادى. وسى ماقساتتا ازەربايجانمەن ارادا كەلىسسوز جالعاسادى»، - دەدى.

سونىمەن قاتار ازەربايجان ۇكىمەتى ايماقتا اسكەري كەلىسپەۋشىلىكتى اسقىندىرۋ جولىن تاڭداسا، ارمەنيا قاراباحتىڭ تاۋەلسىزدىگىن جاقتايتىندارىن دا  العا تارتتى.

بارىمىزگە بەلگىلى ارمەنيا مەن ازىەبايجان اراسىندا 1991-1994 جىلدار ارالىعىندا بولعان قاراباح سوعىسىندا ارميان جاق ازەربايجاننىڭ بىرقاتار ايماقتارىن ءوز قاراماعىنا العان بولاتىن.

بۇگىنگى كۇنى سول ايماقتاردىڭ اگدام، كەلبەدجەر،  لاچين، جەبرايل، فۋزۋلي، كۋباتلى جانە زەنگيلان قالالارى ءالى دە ارميانداردىڭ قول استىندا.

“The Qazaq Times”