يراكتا موسۋل شايقاسىنان كەيىنگى ەڭ ۇلكەن تەراكت بولدى

وزدەرىن «يسلام مەملەكەتى» اتاعان تەررورلىق ۇيىمنىڭ يراكقا باعىتتالعان سوڭعى قان توگىستى شابۋىلدارىنان كەم دەگەندە 74 ادام قازا تاپتى. بۇل ەلدە شىلدە ايىندا تامامدالعان موسۋلدى قايتارىپ الۋ شايقاسىنان كەيىنگى ەڭ ۇلكەن قاندى شابۋىل بولدى. بۇل تۋرالى فرانتسيانىڭ باسىلىمدارىنا سىلتەمە جاساي وتىرىپ، «شينلاڭ» اقپاراتتىق سايتى جازدى.

فرانتسۋز اقپارات قۇرالدارىنىڭ 14 قىركۇيەك كۇنى حابارىندا، سول كۇنى يراكتىڭ زيكال پروۆينتسياسىنداعى تەررورلىق شابۋىلدان قازا تاپقاندار سانىنىڭ  الى كۇنگە دەيىن بەلگىسىز ەكەنىن، بىراق كەمىندە 74 ادام قايتىس بولعانىن، ونىڭ ىشىندە يران ازاماتتارىنىڭ بار ەكەنىن دە حابارلاعان بولاتىن. شابۋىلدى «يسلام مەملەكەتى» ءوز موينىنا العان.

يراك قاۋىپسىزدىك تاراۋلارىنىڭ مالىمەتىنە سايكەس، تەررورلىق شابۋىل 14 قىركۇيەك كۇنى ءتۇس الەتىندە، اتالعان پروۆينتسياداعى ءبىر مەيرامحانادا بولعان. اۆتوماتپەن قارۋلانعان بىرنەشە تەرروريست مەيرامحاناعا باسىپ كىرىپ، وق جاۋدىرعان. بۇدان كەيىن شابۋىلداۋشىلار اۆتوكولىككە وتىرىپ، قاۋىپسىزدىك كۇشتەرى ورنالاسقان عيمارات ماڭىنا كەلگەندە كولىكتەرىندەگى جارىلعىشتى ىسكە قوسقان. ال شابۋىلدىڭ تاعى ءبىرى اۆتوباندا كورشىلەس يراندىق قاجىلار جانە تۋريستەر شوعىرلانعان ورىننىڭ ماڭىندا جاسالدى.

شەتەل جانە يراك اقپارات كوزدەرىنىڭ حابارىنا قاراعاندا، «يسلام مەملەكەتى» تەررورلىق ۇيىمى كۇز ايلارىندا يراكقا باعىتتالعان سەريالىق شابۋىلداردى جوسپارلاپ وتىر. بۇل تەررورلىق ۇيىمنىڭ موسۋل شايقاسىندا جەڭىلىس تابۋىنا بايلانىستى بەرگەن جاۋابى دەلىنگەن.

“The Qazaq Times”