ساۋد ارابياسىنىڭ كورولى. فوتو: The Independent.

وتكەن اپتانىڭ سوڭىندا، ءبىر عانا تەلەفون قوڭىراۋى ۇزاققا سوزىلعان كاتار داعدارىسىنا وڭدى وزگەرىستەر الىپ كەلگەن ەدى. BBC جاڭالىقتار قىزمەتىنىڭ جانە «ءال-جازيرا» اگەنتتىگىنىڭ 9 قىركۇيەكتەگى حابارىندا، 8 قىركۇيەك كۇنى ساۋد ارابياسى كورولدىگىنىڭ حانزاداسى مەن كاتار ءامىرى تەلەفون ارقىلى سويلەسىپ، ەكى ەل اراسىنداعى كىربەڭدىكتى وڭدى جولمەن شەشۋگە كەلىسكەنى تۋرالى ايتىلعان. دەگەنمەن سونىڭ ەرتەسىندە، ياعني، 9 قىركۇيەك كۇنى ساۋد ارابياسى ءوزىنىڭ رەسمي اقپارات اگەنتتىگى ارقىلى بۇل قادامدارعا قاراما-قايشى شەشىم جاريا ەتتى. بۇل تۋرالى "شينلاڭ" اقپاراتتىق سايتى جازدى.

ساۋد ارابياسىنىڭ رەسمي اقپارات اگەنتتىگى 9 قىركۇيەك كۇنى تاڭەرتەڭگى حابارىندا، قوڭىراۋ كەزىندە كاتار ءامىرى 4 ەلدىڭ تالاپتارى بويىنشا كەلىسىم جۇرگىزۋگە ءازىر ەكەنىن ايتقان. بۇعان ساۋد ارابياسى حانزاداسى دا العىس ءبىلدىردى دەگەن ەدى. الايدا، كاتار اقپاراتتىق اگەنتتىگى قوڭىراۋدىڭ ناقتى مازمۇنىن جاريالادى. ءارى بۇل قادامنىڭ اقش پرەزيدەنتى دونالد ترامپتىڭ ءوتىنىشى ارقىلى جاسالعانىن اشىق ايتتى. سونداي-اق، تاراپتاردىڭ باسشىلارى داعدارىستى ديالوگ ارقىلى شەشۋ كەرەك دەگەن.

وڭدى قادام نەگە قىرىن قاراپ كەتتى؟ اڭگىمەنىڭ بىلتەسى – ساۋد ارابياسى تارابى كاتار اقپاراتتىق اگەنتتىگىنىڭ سويلەسۋ مازمۇنىن جاريا ەتكەنىنە  قاتتى اشۋلاندى. ءارى، سىرتقى ىستەر مينيسترلىگى كاتاردى "فاكتىلەردى بۇرمالادى" دەپ ايىپتاپ: «بۇنىڭ ءوزى كاتاردىڭ ديالوگكە شىعۋى شىنايى نيەتتە ەمەس ەكەنىن كورسەتەدى»، – دەپ مالىمدەدى. سونىمەن ساۋد ارابياسى كاتارمەن بولعان بارلىق ديالوگتار مەن بايلانىستاردى توقتاتاتىنىن جاريا ەتتى. ءارى بۇل شەشىمى، كاتار جاقتىڭ پوزيتسيانى ناقتىلاۋ ءۇشىن اشىق مالىمدەمە شىعارعانعا دەيىن جالعاستىراتىن بولدى. ءتىپتى وسى حاباردى تاراتىپ جىبەرگەن كۋۆەيتتىڭ اقپارات مەديالارىنا دا «وكپەلەگەن».

مىنەع وسىلاي ءبىر قوڭىراۋدىڭ باستاعان وڭدى جاڭالىعى ءبىر كۇننەن كەيىن ەكى جاقتىڭ جاڭا جانجالىنا اينالىپ شىعا بەردى. دەسە دە، ساۋد ارابياسى حانزاداسىنىڭ مۇراگەرلىك لاۋازىمعا وتىرعاننان بەرى ساۋد ارابياسىمەن شىعاناق ەلدەرى اراسىنداعى ديپلوماتيالىق قاتىناستى بارىنشا قولداپ كەلە جاتقانىن انىق بايقايمىز.

“The Qazaq Times”