تالل-افاردان قاشىپ شىققان تۇرعىندار. فوتو: en.alalam.ir.

يراكتىڭ ەكىنشى ۇلكەن قالاسى موسۋلدان دايش كۇشتەرىن ىعىستىرىپ تاستاعاننان كەيىن، يراك ۇكىمەت ارمياسى اقش باس بولعان دايش-كە قارسى حالىقارالىق كواليتسيامەن بىرلەسە وتىرىپ، موسۋلدىڭ باتىسىندا 60 شاقىرىم جەردەگى تالل-افار قالاسىن قايتارىپ الۋ سوعىسىن باستاعان. بۇل شايقاستىڭ باستالعانىنا ەكى اپتاداي بولسا دا، تالل-افاردى قايتارىپ الۋ قيىنعا سوعۋدا. سەبەبى، بۇل قالا دايش-تىڭ يراكتاعى سوڭعى تابان تىرەر تياناعى بولعاسىن دا، تەررورلىق كۇشتەر بار كۇشىن سالىپ قارسىلاسۋدا. ەكى كۇن بۇرىنعى يراك اسكەري قولباسشىلارى بەرگەن مالىمەتتە يراك ارمياسى تالل-افار قالاسىنا كىرگەن بولاتىن.

قازىر بۇۇ بوسقىندار ءىس جونىندەگى ارناۋلى كوميتەت، اتالعان قالاداعى 30 مىڭ بەيبىت تۇرعىننىڭ قاتەردە قالعانىن حابارلاپ وتىر. «اناتولى» اقپارات اگەنتتىگىندە جاريالانعان، بۇۇ بوسقىندار ءىسى جونىندەگى كوميتەتتىڭ مالىمدەمەسىندە، دايش سودىرلارى بەيبىت تۇرعىنداردى ۇكىمەت ارمياسىنا قارسى قالقان رەتىندە پايدالانۋى مۇمكىن دەلىنگەن.

قالادا قازىر 30 مىڭ بەيبىت تۇرعىن قورشاۋدا جاتىر. ولاردىڭ قاشىپ قۇتىلماق بولعاندارى سودىرلار جاعىنان وققا ۇشۋدا. قازىر بوسقىندار ءىسى جونىندەگى جوعارى كوميسسيا تالل-افارداعى جازىقسىز تۇرعىنداردىڭ زارداپ شەكپەۋى ءۇشىن قالانى دايش سودىرلارىنان ازات ەتۋ ىسىمەن اينالىسۋدا.

“The Qazaq Times”