فوتو: India Tribune

ءۇندىستاندا 169 McDonald's مەيرامحاناسى جابىلادى. بۇل تۋرالى كومپانيا وكىلدەرى فرانشيزانىڭ جەرگىلىكتى وپەراتورىمەن بولعان سوت پروتسەسىنەن كەيىن مالىمدەدى. 

الەمگە تانىمال فاست-فۋدتىڭ ۇندىستانداعى وكىلدىگى Connaught Plaza Restaurant Ltd (CPRL) وپەراتورىنىڭ كەلىسىمشارتتى بۇزىپ، تولەمدەردى ۋاقىتىلى وتكىزبەگەنى ءۇشىن مەيرامحانالار جەلىسى ءوز قىزمەتىن توقتاتاتىنىن حابارلادى.

ءۇندىستاننىڭ سولتۇستىگى مەن شىعىسىنداعى مەيرامحانالار جابىلعانىمەن، وڭتۇستىك پەن باتىس بولىكتە ورنالاسقان باسقا وپەراتورعا قارايتىن وزگە McDonald's-تار قىزمەتىن جالعاستىرا بەرەدى.

ماۋسىم ايىندا McDonald's كومپانياسى قوعامدىق تاماقتاندىرۋ مەكەمەسىنە بەرىلەتىن ليتسەنزيانى ۇزارتا الماعانى ءۇشىن نيۋ-دەليدەگى 40-قا جۋىق مەيرامحانانى جاۋىپ تاستاعان بولاتىن.

1,25 ملرد حالقى بار ءۇندىستان شەتەلدىك ترانسۇلتتىق كورپوراتسيالار ءۇشىن تارتىمدى نارىق. دەگەنمەن شەتەلدىك كومپانيالارعا جەرگىلىكتى وپەراتورلارمەن جۇمىس ىستەۋگە جانە بىرقاتار بيۋروكراتيالىق قيىندىقتارمەن ۇشىراسۋعا تۋرا كەلەدى. الەمدىك برەندكە اينالعان ساۋدا بەلگىلەرى ءۇندىستان ەكونوميكاسىنا تەك 1990 جىلدارى، ەكونوميكا اشىقتىق ساياساتىن ۇستانا باستاعان تۇستا عانا كەلە باستادى.

ايتا كەتەيىك، ميللياردتان اسا حالقى بار مەملەكەتتە جابىلعان  McDonald's-تىڭ ءبىزدىڭ ەلدە جۇمىس ىستەپ جاتقانىنا ەكى جىلدان استى.

“The Qazaq Times”