قىتاي ءۇندىستان شەكاراشىلارى. فوتو: NDTV.com.

باتىس گيمالايداعى تالاستا تۇرعان شەكارا وڭىرىندە قىتاي مەن ءۇندىستان اسكەرى قاقتىعىسىپ قالدى. ءۇندىستان جاقتىڭ بەرگەن حابارىنا قاراعاندا، ۇندىستان شەكارا قورعاۋشىلارى پانگونگ كولىنىڭ جيەگىندەگى تالاستاعى شەكارا سىزىعىنا قىتاي اسكەرلەرىن كىرگىزبەس ءۇشىن قارۋسىز توسقاۋىل قويعان. ەكى ەلدىڭ شەكاراشىلارى ءبىر-بىرىنە وق اتپاعانىمەن، تاس لاقتىرعان. بۇل تۋرالى BBC-ءدىڭ ونلاين قىزمەتى حابارلايدى.

ازىرگە ءۇندىستان ۇكىمەتى ءوزىنىڭ قانداي تالاپتارى بار ەكەنىن ايتپادى. ال، قىتاي جاق تاراتقان حابارلامادا، شەكاراشىلار شەكارا سىزىعىن بويلاپ شارلاۋ جاساپ جۇرگەندە ءۇندىستان اسكەرلەرىنىڭ قارسىلىعىنا ۇشىراعان. قىتاي جاق ءۇندىستاننىڭ ەكى ەل اراسىندا جاساسقان شەكارا مەن تالاستاعى شەكارا اۋماعىنداعى كەلىسىمدى بەرىك ساقتاۋىن تالاپ ەتۋدە. بۇل ارينە ەكى ەل اراسىنداعى شەكارالىق جانجالدىڭ العاشقىسى ەمەس، سوڭعىسى دا بولماق ەمەس.

ماۋسىم ايىنان بەرى نەپال-سيككيم وڭىرىندە قىتاي مەن ءۇندىستان شەكارا تۇيىلىسىندە دە قاقتىعىستار بولىپ كەلەدى. قىتايدىڭ شەكارا سىزىعىنا جاقىن جول قۇرىلىسىنا ءۇندىستان شەكاراشىلارى توسقاۋىل جاساپ كەلگەن. سونىڭ ناتيجەسىندە قىتاي-ءۇندىستان ارا-قاتىناسى سالقىنداپ قالعان ەدى. بۇل ەلەردىڭ شەكتەسكەن شەكارالارى 4 مىڭ شاقىرىمنان اسادى. شەكارا قاقتىعىستارى كوپتەپ بولادى. وسى ءۇشىن قىتاي-ءۇندىستان اراسىندا 1962 جىلى شەكارا سوعىسى دا بولعان ەدى.

“The Qazaq Times”