قىتاي سولتۇستىك كورەيادان تاۋار يمپورتتاۋدى توقتاتادى

 قىتاي سولتۇستىك كورەيادان تەمىر رۋدالارى مەن تەڭىز ونىمدەرىن تاسىمالداۋدى توقتاتادى. مەملەكەت مۇنداي ارەكەتكە بۇۇ-نىڭ  سولتۇستىك كورەياعا قارسى قابىلداعان سانكتسياسىنا قوسىلعان مەملەكەت رەتىندە بارىپ وتىر. بۇل تۋرالى APF اقپاراتتىق اگەنتتىگى جازدى. 

قىتايدىڭ ساۋدا مينيسترلىگىنىڭ سايتىندا وسى اپتانىڭ سەيسەنبىسىنەن باستاپ، سولتۇستىك كورەيادان يمپورتتالاتىن كومىر، تەمىر رۋدالارى مەن تەڭىز ونىمدەرىنە شەكتەۋ قويىلاتىنى جونىندە اقپارات جاريالاندى. بۇل اقش-تىڭ: "قىتاي سولتۇستىك كورەياعا ەكونوميكالىق قىسىم كورسەتۋ ءۇشىن قولىنان كەلگەننىڭ بارلىعىن جاساپ وتىرعان جوق، سول سەبەپتى كحدر ءوزىنىڭ ەڭ ءىرى ساۋدا ارىپتەسىنە ارقا سۇيەپ، كۇشەيىپ كەلەدى" دەگەن وتكىر مالىمدەمەسىنەن كەيىن جاسالعان شارا.

قىتاي ءوز كەزەگىندە بۇۇ جاريالاعان سانكتسيالاردى تولىقتاي قولداپ، جۇزەگە اسىرۋعا بارىن سالاتىنىن جەتكىزدى.

اتالعان سانكتسيالىق رەجيم سولتۇستىك كورەيانىڭ قۇرلىقارالىق بالليستيكالىق زىمىرانداردى سىناقتان وتكىزىپ، اقش-قا قارسى جانە كورەي تۇبەگىنىڭ بەيبىتشىلىگىنە قاۋىپ توندىرگەنى ءۇشىن قولعا الىنىپ وتىر.

وتكەن اپتادا اقش پرەزيدەنتى مەن كحدر باسشىسى اراسىندا ء"سوز سوعىسى" بولىپ، سولتۇستىك كورەيانىڭ تىنىق مۇحيتىنداعى گۋام ارالدارىنا شابۋىل جاساۋ تۋرالى ەسكەرتپەسى ءىس جۇزىندە ورىندالسا، امەريكا دا ايانىپ قالمايتىنى ايتىلعان ەدى. قىتاي وسى داۋدا مەدياتسيالىق قىزمەتتى قولىنا الىپ، ەكى جاقتى تەلەفون ارقىلى بايلانىستا قوس تاراپتى كەلىسسوزدەرگە شاقىردى.

گۋام ارالدارىنىڭ گۋبەرناتورى ەددي كالۆو اقش پرەزيدەنتى دونالد ترامپتىڭ سولتۇستىك كورەياعا قارسى ايتقان اشۋ-ىزاعا تولى سوزدەرىن تولىقتاي قولداپ وتىر.

قىتايدىڭ سىرتقى ىستەر مينيسترلىگى ءباسپاسوز قىزمەتىنىڭ باسشىسى حۋا ءچۇن يىڭ (Hua Chun Ying): "كورەي تۇبەگىندەگى جاعداي ونسىز دا قيىن ءارى قۇبىلمالى. بۇل جاعدايدا قوس تاراپ سابىر ساقتاپ، ماسەلەنى كەلىسسوزدەر ۇستەلىنە وتىرىپ، شەشۋگە ارەكەت جاساۋى كەرەك", - دەدى.

“The Qazaq Times”