فوتو: ينوسمي

بيىل فۋتبول الەمىندە ءبىر عانا نەيماردىڭ بارسەلونادان پسج-عا اۋىسۋى ەلدى ەلەڭ ەتكىزدى. ال وسى جىلعى پىكىرتالاس "فۋتبول ماۋسىمى قالاي باستالادى؟ نەسىمەن قۋانتادى؟ كىمدەر چەمپيون بولادى؟ «التىن دوپ» كىمگە بۇيىرادى نەمەسە تاعىدا ەكى يناگالاكتيكاننىڭ (رونالدو، مەسسي) قايسىنا بۇيىرادى؟" دەگەن سۇراقتار توڭىرەگىندە دەپ ويلاساڭىز قاتەلەسەسىز. مۇنداي پىكىرتالاستى ەفيردەن كورەرىڭىز انىق. ال اۋىلداعى وي مۇلدەم باسقاشا. مۇمكىن وسىعان بايلانىستى دا اۋىلمەن قالانىڭ ايىرماشىلىعى بار بولار. بىراق ءبىراز جۇرسەڭىز قالا دا اۋىل سەكىلدى بولىپ كەتەدى-اۋ شاماسى.

بىلاي قاراساڭىز اڭگىمەنىڭ قاراپايىم بولىپ وزەكتى ءتۇس الۋى، ونىڭ باستالۋى مەن جالعاسۋ بارىسى ادامعا بايلانىستى. ارينە ول سوعۇرلىم ءبىر ماسەلەنى كوتەرىپ تەرەڭ قازبالاماسا دا، اۋىلداعى جاندار مەيلىنشە شاما شارقىنا قاراي، جاڭالىقتاردان  بولماسا عالامتور بەتتەرىنەن كورگەن بىلگەنىن ورتاعا سالىپ وزدەرىنشە تالقىلاپ تاستايدى. ءدال وسى كۇندەگى ادەت بولىپ قالعان جاعداي فۋتبول توڭىرەگىندەگى اڭگىمە باستالا قالسا ءسوز باسى «بارسەلونا» نە «رەال مادريد» كلۋبتارى نەمەسە رونالدو مەن  مەسسيدەن جالعاسادى. ەندى ولاردىڭ قاتارىنا نەيمار قوسىلدى. بۇل دەگەنىڭىز مىنا ەكى كلۋبپەن بىرگە «پسج»-دا قاتارلاسا تۇسكەنىنىڭ ايقىن كورىنىسى بولار، بالكىم. وسى فۋتبولشىلارسىز، وسى كلۋبتارسىز الەم فۋتبولى بوس كەڭىستىك بولىپ قاڭىراپ قالاتىن سياقتى. وسى ماسەلە كۇشەيىپ كەلەدى قازىر.

فرانتسۋزدار قالتاسىنداعى قوماقتى قارجىنى جۇمساپ نەيماردى پريجدىكتەر ساپىنا قوسۋ ماقساتى ارقىلى ەۋروپا چەمپيوناتى بولۋدى كوزدەگەنى بەلگىلى. ويتكەنى وتكەن ماۋسىمدا بارسەلونادان ويسىراي جەڭىلگەننەن سوڭ كلۋب يەلەرىن بىلاي قويعان كۇننىڭ وزىندە ۋاين ەمەري ءوزىن ءوزى ءالى كۇنگە كەشىرە الماي جۇرگەن بولار.  ال ويىنداعى ەسەپتى ەسكە الۋدىڭ ءوزى ۇيات. وسىلاي بولعان كۇننىڭ وزىندە دە،باسشىلىق شتابى دەمىن ىشىنە جۇتىپ، باپكەردەن سەنىمىن ۇزبەي وتىر ازىرگە. جۇمىس ىستەۋىنە دە ەركىن جاعداي جاساپ جاتىر.تىلەگىن ورىنداپ اسپانداعى ايدى دا (نەيمارعا قاتىستى) الىپ بەردى. مۇنداي جاعدايدى ءبىز بىرنەشە گرانت كلۋبتاردان كورە المايمىز. ەگەر «پسج» ورنىندا «چەلسي» نەمەسە «رەال» كلۋبتارى بولعان كۇندە، مىنا جاعدايدا باپكەردىڭ كلۋبتا قالۋى ەكى تالاي ەدى. سەبەبى قازىرگى كەزدە كەشەگى شۋاقتى كۇندەرىن اڭساپ جۇرگەن «ميۋ»-ءدىڭ جەتىستىكتەرىنىڭ بارشاسىن سەر الەكستىڭ ارقاسىندا دەپ بىلەدى. الايدا بۇل دۇرىس ەمەس سياقتى. البەتتە، فەرگيۋسسون بۇل كلۋب تاريحىندا كەسكىن بۇرىلىس جاساعان تۇلعا، بىراق باپكەرگە وسى مۇمكىندىكتەردى سىيلاپ، كەزدەيسوق جەڭىلىستەر كەزىندە اشۋمەن كلۋبقا باسقا باپكەر الىپ كەلمەي سەنىم ءبىلدىرىپ، اۋىر كۇندە دە قولداپ تۇرعان ميۋ-دىڭ باسشىلىق ۇجىمىن ۇمىتپاعان ءجون. ميۋ-دان «رەال مادريد» ، «چەلسي» كلۋبتارىنىڭ ايىرماشىلىعى وسى تۇستا بەلگىلى بولسا كەرەك.

«رەال» كلۋبى سەكىلدى لوندوندىقتاردىڭ تاريحى نەعۇرلىم ايتارلىقتاي باي ەمەس شىعار، دەگەنمەن ولاردى  مادريتتىكتەر ىزىمەن ءجۇرىپ ادام ەتكەن ءسوزسىز رومان ابراموۆيچ. رەسەيلىك بۇل ميللياردەر كلۋبتى ساتىپ العالى شىن مانىندە باپكەرى. «رەال»-دا وسى كەبىندى كيگەلى ءبىرشاما ۋاقىت بولعان. قوس كلۋب باسشىلارى باپكەرلەردى قولعاپتاي اۋىستىرۋدان جالىقپايتىن تاۋەكەلشىل كىسىلەر. كەيدە بۇل تىرلىگىدە ءوز سەنىمىن اقتايدى. بۇل جاعداي فۋتبولشىلار پسيحولوگياسىنادا اسەر ەتپەي قويماسا كەرەك. بىراق اقشاسىن تولەپ جاعدايىن جاساپ قويعان سوڭ ويىنشىلاردىڭ دا ءتىلى قىسقارىپ نە ايتسا سوعان كونىپ كەتە بەرەدى-اۋ. ەگەر زيدان بۇل ماۋسىمدا ەشقانداي ناتيجە كورسەتە الماسا، كلۋبتا قالۋىنا كىم كەپىلدىك بەرەدى؟! ويتكەنى بۇرىنعى  يتاليالىق باپكەر انچەلوتتيدى دە ورنىندا قالادى دەپ تۇرعان كەزدىڭ وزىندە اۋىستىرعانى ءالى ۇمىتىلا قويعان جوق.

ءبىر قىزىعى ەكراننان پەرەس پەن ءابراموۆيچتى كورسەك بىردەن تانيمىز. بىراق «ميۋ» نەمەسە «پسج» كلۋب باسشىلارىن ونشا بىلە بەرمەيمىز. كورسەك تە تانىمايتىن شىعارمىز. سەبەبى ول باسشىلار، ءوز موينىنا باپكەرلىك جاۋاپكەرشىلىگىن الماعاننان بولار.

«پسج»-دا كەزىندە لوران بلانعا سەندى، مۇمكىندىك بەرمەدى ەمەس، بەرگەن. بلان قالاي جاساسا دا ونىسىنان ەش ناتيجە بولمادى. پاريجدىكتەر مۋزەيىندە  مەملەكەت بىرىنشىلىگى كۋبوگىنىڭ كوبەيىپ كەتكەندىگى سونشالىقتى چەمپيوندار ليگاسى كۋبوگىنا ارنالعان ورىنداردى يەلەپ جاتقاندىعى ءۇشىن دە وسى شەشىمگە كەلۋگە ءماجبۇر بولدى ولار.  لوران بلاندا ءوزىنىڭ قولىنان كەلمەگەنىن ءتۇسىندى مە، ايتەۋىر، كلۋبتان ءۇنسىز كەتتى. تاريح بەتتەرىندە ءوز كلۋبىنىڭ اتىن وشپەستەي ەتىپ جازدىرۋ ماقساتىندا يسپاندىق باپكەر كەلدى. العاشىندا بايگەگە قوسقان قارا قۇلانداي شاۋىپ كەلە جاتقان، سوڭىنا از قالعان شاقتا ابايسىزدا جازىم بولعانىنا كىمدى كىنالايمىز؟

جالپى كومەنتاتور جەتكىزگەن از مالىمەتتەردەن اۋىل جانكۇيەرلەرى وزدەرىنشە وسىلاي پىكىرلەسەدى. ءبىر جاعى نىساناعا ءدال تيمەسە دە، اقيقاتقا جاقىن فاكتىنى كەلتىرەدى. ال مۇنداي بولجام جاساۋ اناۋ-مىناۋ دەگەن جوعارى دارەجەدەگى فۋتبول توڭىرەگىندەگى كىسىلەردىڭ قولىنان كەلە بەرمەيتىن سياقتى.

نۇرعيسا كامالبەك

“The Qazaq Times”