تاجىكستان يراندى تەرروريستەردى قولداپ، بەلگىلى ساياساتكەرلەردى ءولتىرتتى دەپ ايىپتادى

تاجىكستان ىشكى ىستەر مينيسترلىگى يراندى تەرروريستەردى قارجىلاندىرىپ، 1992-1997 جىلدارى ەلدەگى بەلگىلى ساياساتكەرلەردى ءولتىردى دەپ ايىپتادى.

تاجىكستان ءىىم تامىزدىڭ 8-ءى كۇنى مەملەكەتتىك تەلەارنالاردىڭ بىرىنەن 1992-1997 جىلدارى ەلدە بولعان ازامات سوعىسى كەزىندە يران تەرروريستەردى قارجىلاندىرۋ ارقىلى بەلگىلى ساياساتكەرلەر، جۋرناليستەر مەن عالىمداردى ولتىرتكەن دەگەن مازمۇنداعى دەرەكتى فيلم كورسەتكەن. 45 مينۋتتىق دەرەكتى فيلمدە تاجىكستان قورعانىس ءمينيسترىنىڭ ەكس-ورىنباسارى ابدۋلحاليم نازارزودانىڭ تاپسىرماسىمەن ادام ولتىرگەن تاگويمۋراد اشراپوۆ، ابدۋكودىر ابدۋللاەۆ جانە سايمۋحريددين كۋردراتوۆ ەسىمدى ءۇش ازامات سويلەگەن.

ولار 1999 جىلى تاجىكستان جوعارى كەڭەسىنىڭ سپيكەرى بولعان ءسافارالى كەنجاەۆتى، سول كەزدەگى بەلگىلى جۋرناليست، ساياساتكەر وتاحون ءلاتيفيدى، بەلگىلى عالىمدار مۋحامماد وسيمي، يۋسۋف يسحاكي، مينحودجا گۋلياموۆانى، پرەزيدەنت كەڭەسشىسى كارىم يۋلداشەۆتى جانە بەلگىلى جازۋشى سايف راحيم ءافارديدى 2 مىڭ دوللار اقشا ءۇشىن نازارزودانىڭ تاپسىرماسى بويىنشا ولتىرگەندەرىن مويىنداعان.

بۇدان بولەك فيلمدە تاگويمۋراد اشراپوۆ ەسىمدى ازامات 1995 جىلى يراننىڭ قۇم جانە گورگان قالالارىندا اسكەري دايىندىقتان وتكەنىن، ەكى جىلدان كەيىن تاجىكستانعا جوعارىدا اتالعان ساياساتكەرلەر مەن ەلگە تانىمال ازاماتتاردى ءولتىرۋ ءۇشىن قايتىپ ورالعانىن ايتقان. بىراق دەرەكتى فيلمدە كورسەتىلگەن تەرگەۋ ۆيدەولارى قاي ۋاقىتتا تۇسىرىلگەنى ايتىلماعان.

قازىرگى تاڭدا يران مەن تاجىكستان اراسىنداعى قارىم-قاتىناس  ەڭ اۋىر كەزەڭدى باسىنان وتكەرۋدە. ەكى ەل اراسى 2013 جىلى يراندا بەلگىلى وليگارح باباك زاندجاني تۇتقىندالعاننان كەيىن بۇزىلعان بولاتىن. سول ۋاقىتتا يران قۇقىق قورعاۋ ورگاندارى زاندجانيگە تاجىكستان ەكونوميكاسىنا 2 ميلليارد دوللار يران قارجىسىن سالدى دەپ ايىپتاعان ەدى. بىراق تاجىكستان تاراپى تەگەراننىڭ بۇل ايىپتاۋىن نەگىزسىز دەپ مالىمدەگەن. الايدا دۋشانبەنىڭ ايتقان ۋاجىنە قاراماستان يران بيلىگى ءزاندجانيدى ءولىم جازاسىنا كەسكەن بولاتىن. بۇدان كەيىن يران مەن تاجىكستان اراسىنداعى قارىم-قاتىناس 2015 جىلى تەگەران بيلىگى تاجىكستاندا تەرروريستىك ۇيىم دەپ تانىلعان «تاجىكستان يسلام جاڭعىرۋى پارتياسىنىڭ» باسشىسى مۋحيددين كابيريدى رەسمي تۇردە قابىلداعاننان كەيىن ءتىپتى قيىنداعان ەدى.

“The Qazaq Times”