جولاۋشىلار ۇشقىشسىز ۇشاقتارعا وتىرمايتىندارىن ايتادى

ۇشقىشسىز ۇشاقتارعا اۋىسۋدان اۋە كومانيالارى جىلىنا تەك قاراجات ۇنەمدەپ قانا قويماي، ۇشۋ قاۋىپسىزدىگىنىڭ دەڭگەيىن جوعارىلاتا الادى. مۇنداي پىكىرگە UBS ساراپشىلارى كەلگەن.

ساراپشىلاردىڭ باعالاۋى بويىنشا، اۋە تاسىمالداۋشىلارى اۆتوماتتى جۇيەمەن باسقارىلاتىن اۋە لاينەرلەرىنە ءوتۋ ارقىلى جىلىنا 35 ملرد دوللار ۇنەمدەي الادى ەكەن.  Financial Times باسىلىمىنىڭ جازۋىنشا، مۇنداي جاعدايدا كومپانيالار ۇشقىشتارعا ەڭبەكاقى تولەمەيدى،ساقتاندىرۋ مەن جاعارماي وتىنىنا كەتەتىن شىعىندار ازايادى.

دەگەنمەن اۆتوپيلوتتى ۇشاقتاردىڭ قولدانىستا بولۋىن جولاۋشىلار اسا قالامايتىن كورىنەدى. سەبەبى جاقىندا جۇرگىزىلگەن ساۋالناما بويىنشا 8 مىڭ رەسپوندەنتتىڭ 54 پايىزى روبوت باسقاراتىن ۇشاقتارعا وتىرمايتىندارىن مالىمدەگەن. تەك 17 پايىزى عانا وسىنداي ۇشۋلارعا كەلىسەتىنىن ايتقان.

ال اقش-تىڭ Boeing Co. اەروعارىشتىق توبى  بۇرىن وسى تەحنولوگيالاردى جاساۋعا قىزىعۋشىلىق تانىتقانىن ايتسا، وتكەن اپتادا ولار ۇشاقتاعى بورتتىق راديوەلەكتروندىق اپپاراتۋرانى جاساپ شىعارۋمەن اينالىسىپ جاتقاندارىن حابارلاعان.

قازىرگى كەزدە كومەرتسيالىق ۇشاقتاردىڭ ۇشقىشتارى ۇشۋ، قونۋ جانە باسقادا وپەراتسيالاردى ورىنداۋ كەزىندە كومپيۋتەلىك جۇيەنى بەلسەندى پايدالانادى. UBS ساراپشىلارىنىڭ سوزىنشە، اۋە كومپانيالار ەندى كوممەرتسيالىق رەيستەگى ەكى ۇشقىشتىڭ بىرەۋىن قىسقارتادى، وسىلايشا ەكىنشى ۇشقىش جەردەگى ديسپەتچەرلىك پۋنكت ارقىلى ۇشۋ كەزىندەگى باسقارۋ جۇمىستارىنا كومەكتەسۋى مۇمكىن.

ايتا كەتەيىك، سوڭعى كەزدە روبوتتاندىرۋ جۇيەسى جىلدام دامىپ كەلەدى. تيىسىنشە، بۇل ادامزاتتىڭ ەڭبەك قابىلەتىنە قاۋىپ توندىرەدى. سەبەبى روبوتتار جۇمىس ىستەگەن جەردە ادامداردىڭ ەڭبەگى قاجەتسىز بولاتىنى بەلگىلى.

 “The Qazaq Times”