رەكس تيللەرسون جانە سەرگەي لاۆروۆ. فوتو: Politico Europe.

ەستەرىڭىزدە بولسا اقش-تىڭ رەسەيگە باعىتتاعان جاڭا سانكتسيا زاڭ جوباسىنان كەيىن، كرەمل تارابى بىردەن قارسى رەاكتسيا كورسەتىپ، رەسەيدەگى اقش ديپلوماتيالىق جانە تەحنيكالىق قىزمەتكەرلەرىنەن 755 ادامدى قىسقارتاتىنىن جاريا ەتكەن ەدى. اقش مەملەكەتتىك حاتشىسى رەكس تيللەرسون وسىدان ەكى كۇن بۇرىن رەسەيدىڭ ارەكەتىنە قىركۇيەككە دەيىن ءبىر جاۋابىن بەرەتىنىن ايتىپ ءوتتى. بۇل تۋرالى «تۇرىك تەلە-راديو» قىزمەتىنىڭ رەسمي سايتى حابارلاپ وتىر.

فيليپپين ورتالىق قالاسىندا بولىپ وتكەن 50-ءشى رەت وتكىزىلىپ وتىرعان وڭتۇستىك-شىعىس ازيا ەلدەرى سامميتىندە اقش مەملەكەتتىك حاتشىسى رەكس تيللەرسون مەن رەسەي سىرتقى ىستەر ءمينيسترى سەرگەي لاۆروۆ جۇزدەسكەن بولاتىن. كەزدەسۋ كەزىندە رەسەي ءمينيسترى ماسكەۋدىڭ اتالعان قادامىن قايتالاي ەسكە ءتۇسىرىپ جانە ول تۋرالى ءتۇسىنىپ بەردى.

اقش وكىلى تيللەرسون بولسا بۇل شەشىمگە 1 قىركۇيەككە دەيىن ءبىر تويتارىس جاۋابىن بەرەتىندەرىن اتاپ ءوتتى. ەكى ەل جوعارى لاۋازىمدىلارىنىڭ كەزدەسۋىندە ديپلوماتيا قىزمەتكەرلەرىن قىسقارتۋ شەشىمى تۋرالى ءبىر قاتار سۇراقتار ورتاعا سالىنىپ، ەكى تاراپ سۇراقتارعا ءوز جاۋاپتارىن قايتارىسقان. رەسەي مەن اقش قارىم قاتىناسى سوڭعى جارتى عاسىرداعى ەڭ ءبىر سالقىن تۇسىندا، مۇنداي قادامداردى ەكى ەل دە اڭدىپ باسىپ، ابايلاپ شەشەرى انىق. ماسكەۋدىڭ بار تالابى رەسەيدەگى اقش قىزمەتكەرلەر سانىن، اقش-تاعى رەسەيلىك قىزمەتكەرلەر سانىمەن تەڭەستىرۋ بولىپ وتىر.

“The Qazaq Times”