فوتو: The Indian Express

سولتۇستىك كورەيا اقش-تى بۇۇ ەنگىزگەن سانكتسيالارىنا باستاماشى بولعانى ءۇشىن "جاۋاپ بەرەتىن" جاعدايعا جەتكىزۋگە ۋادە بەردى.

پيوڭياڭنىڭ (پحەنيان) رەسمي KCNA اقپاراتتىق اگەنتتىگى سەنبى كۇنى بۇۇ قاۋىپسىزدىك كەڭەسى مۇشەلەرىمەن ءبىراۋىزدان قابىلدانعان شەشىمدى "سولتۇستىك كورەيانىڭ تاۋەلسىزدىگىنە زورلىقپەن قول سۇعۋ" دەپ قابىلدادى. وسىدان الدىن، اتالعان اقپارات قۇرالى "كحدر اقش-تىڭ ءتوندىرىپ وتىرعان قاۋپى سەيىلمەيىنشە، ءوز قارۋىنان باس تارتىپ، كەلىسسوزدەر ۇستەلىنە وتىرمايدى", - دەپ مالىمدەگەن بولاتىن. بۇل ويدى فيليپپيندە وتكەن فورۋمدا سۇحبات بەرگەن سولتۇستىك كورەيانىڭ وكىلى بانگ كۆان حيۋك تا ماقۇلداپ: "كورەي جارتىتۇبەگىندەگى جاعدايدىڭ ۋشىعۋى مەن الەمدە يادرولىق قارۋ ماسەلەسىنىڭ تۋىنداۋىنا اقش كىنالى", - دەپ جاۋاپ قاتتى.

سولتۇستىك كورەيانىڭ سوڭعى ۋاقىتتا ءجيى قۇرلىقارالىق بالليستيكالىق زىمىراندار سىناعىن وتكىزۋىنە بايلانىستى بۇۇ وعان قارسى قابىلداعان سانكتسيالاردى ءبىراۋىزدان ماقۇلداعان مەملەكەتتەر ەندى 90 كۇن ىشىندە اتالعان رەزوليۋتسيانى قالاي اينالىمعا ەنگىزەتىنى جونىندە ەسەپ بەرۋى كەرەك. جاڭا ەكونوميكالىق شەكتەۋلەر كحدر ەكسپورتىن 1/3-گە قىسقارتادى. قابىلدانعان رەزوليۋتسياعا سايكەس، مەملەكەتتەرگە سولتۇستىك كورەيادان تەڭىز ونىمدەرىن، كومىر مەن تەمىر رۋدالارىن ساتىپ الۋعا تىيىم سالىنادى. سونداي-اق، كورەيا ازاماتتارىن جۇمىسقا الۋعا، ەلگە كىرگىزۋگە، ورتاق كاسىپكەرلىك جوبالاردى باستاۋعا نە جۇزەگە اسىپ قويعان ءوندىرىس ورىندارىنا ينۆەستيتسيا سالۋعا رۇقسات ەتىلمەيدى.

بۇرىن سولتۇستىك كورەياعا قاتىستى پوزيتسياسىن ناقتىلاماي كەلگەن قىتاي مەن رەسەي دە بۇۇ ۇسىنعان سانكتسيالاردى قابىلداپ، وڭتۇستىك كورەيا مەن اقش-تى كورەي جارتىتۇبەگىندەگى اسكەري جاتتىعۋلارىن توقتاتۋعا شاقىردى.

مانيلادا وتكەن وڭتۇستىك-شىعىس ازيا مەملەكەتتەرى قاۋىمداستىعىنىڭ سامميتىندە وڭتۇستىك كورەيا مەن كحدر سىرتقى ىستەر مينيسترلەرى كەزدەسىپ، قىسقا سويلەستى. كەيىننەن، وڭتۇستىك كورەيانىڭ وكىلى سولتۇستىك كورەيا كەلىسسوزدەرگە كەلۋدەن باس تارتقانىن جەتكىزدى.

 

“The Qazaq Times”