ەندى حالىققا قىزمەت كورسەتۋ ورىندارىندا اقىلى قىزمەت كورسەتەتىن مەنەدجەرلەر بولادى

قازاقستاننىڭ حالىققا قىزمەت كورسەتۋ ورتالىقتارىندا اقىلى  دەربەس مەنەدجەر قىزمەتى ىسكە قوسىلدى. بۇل تۋرالى "ازاماتتارعا ارنالعان ۇكىمەت" مەملەكەتتىك كورپوراتسياسىنىڭ ءباسپاسوز قىزمەتى حابارلادى. 

"ازاماتتارعا ارنالعان ۇكىمەتتە تاعى دا كەزەكتى پيلوتتىق جوبا – ء"سىزدىڭ دەربەس مەنەدجەرىڭىز" ىسكە قوسىلدى. دەربەس مەنەدجەر قىزمەتىن پايدالانعان ادام ءتۇرلى انىقتامالاردى جيناپ اۋرە بولمايدى، ول جۇمىستى مەملەكەتتىك كورپوراتسيانىڭ قىزمەتكەرى اتقارادى. دەربەس مەنەدجەر مەملەكەتتىك قىزمەتتى جەكە كورسەتەدى، قاجەتتى انىقتامالاردى جينايدى، قاجەت بولعان جاعدايدا، بانككە دە بارادى، قۇجاتتىڭ تەلنۇسقاسىن جارامسىز دەپ تانۋ تۋرالى گازەتكە حابارلاندىرۋ بەرەدى جانە باسقالار", - دەلىنگەن ءباسپاسوز حابارلاماسىندا.

«ازاماتتارعا ارنالعان ۇكىمەت» مەملەكەتتىك كورپوراتسياسىنىڭ باسقارما توراعاسى ابىلايحان وسپانوۆتىڭ ايتۋىنشا، قازىرگى ۋاقىتتا كوپتەگەن قىزمەتتەردى الۋ ءۇشىن قاجەتتى قۇجاتتار تىزبەسى بارىنشا ازايتىلعان.

«الايدا، حقكو-دان باسقا دا مەكەمەلەرگە بارۋعا تۋرا كەلەتىن «كۇردەلى» قىزمەتتەر بار. مىسالى، اۆتوسالوننان نەسيەگە نەمەسە ءبولىپ تولەۋگە كولىك ساتىپ العان كەزدە، ءبىزدىڭ دەربەس مەنەدجەرىمىزوزدىگىنەن جىلجىمالى مۇلىك كەپىلىن تىركەيدى، كولىكتى ەسەپكە قويادى جانە قاجەت بولسا، بارلىق دايىن قۇجاتتاردى ۇيگە جەتكىزىپ بەرەدى»، - دەيدى وسپانوۆ.

جاڭا سەرۆيس مەملەكەتتىك كورپوراتسيانىڭ وبلىستىق ماڭىزى بار قالالارداعى 37 فرونت-وفيستەرىندە، سونداي-اق استانا مەن الماتى قالالارىندا ىسكە قوسىلدى، ول حقكو-عا بارۋعا جانە قۇجاتتار جيناۋعا ۋاقىتى جوق جاندارعا ارنالىپ وتىر. جوبا بانكتەن نەسيە الۋشىلار، كولىك ساتىپ الۋشىلار مەن بيزنەس وكىلدەرى اراسىندا سۇرانىسقا يە بولادى دەپ كۇتىلۋدە.

وسپانوۆتىڭ ايتۋىنشا، دەربەس مەنەدجەر قاراپايىم انىقتامالار بويىنشا كەڭەستەر الۋ ءۇشىن عانا ەمەس، باسقا دا وتە سۇرانىسقا يە «كۇردەلى» مەملەكەتتىك قىزمەتتەردى، ونىڭ ىشىندە جىلجىمايتىن مۇلىك وبەكتىسىن جانە كەپىل شارتىن تىركەۋ، جەر ۋچاسكەسىنە جەكەمەنشىك قۇقىعىنا اكتىلەردى رەسىمدەۋ جانە الۋ،جەكە جانە زاڭدى تۇلعالار ءۇشىن نوتاريالدى كۋالاندىرۋسىز جىلجىمايتىن مۇلىككە ساتۋ-ساتىپ الۋ/الماستىرۋ/سىيعا تارتۋ شارتىنتار جاساي وتىرىپ، تىركەۋ قىزمەتتەرى ءۇشىن قولجەتىمدى بولىپ تابىلادى. كەلەشەكتە بۇل ءتىزىم ۇلعاياتىن بولادى. ازاماتتىڭ اتىنا قۇجاتتاردى جيناۋدى كورپوراتسيا قىزمەتكەرى نوتاريالدى كۋالاندىرىلعان سەنىمحات نەگىزىندە جۇزەگە اسىراتىن بولادى.

كەڭەستەر بەرۋدى دەربەس مەنەدجەر تەلەفون، «Telegram» جانە «Whatsapp» ۆەب-مەسسەندجەرى ارقىلى دۇيسەنبى مەن سەنبى ارالىعىندا ساعات 9.00-دەن 20.00-گە دەيىن جۇرگىزەدى، ال دايىن قۇجاتتار قىزمەت الۋشىنىڭ ەلەكتروندىق پوشتاسىنا جىبەرىلەدى نەمەسە ءوز قولىنا جەتكىزىلەدى. دەربەس مەنەدجەر قاجەت بولعان جاعدايدا، تاپسىرىس بەرۋشىنىڭ ۇيىنە بارادى.

دەربەس مەنەدجەردىڭ قىزمەتى جەكە جانە زاڭدى تۇلعالارعا اقىلى تۇردە كورسەتىلەدى.مۇنداي قىزمەتتىڭ قۇنى مەملەكەتتىك كورسەتىلەتىن قىزمەتتىڭ كۇردەلىلىگىنە جانە ەلدى مەكەننىڭ ورنالاسقان جەرىنە بايلانىستى بولادى.

“The Qazaq Times”