پەنتاگون: كرەمل شەشىمى ەكى ەلدىڭ اسكەري ىستەرىنە اسەر ەتپەيدى

اقش قورعانىس دەپارتامەنتىنىڭ (پەنتاگون) رەسمي وكىلى جەفف دەۆيستىڭ مالىمەتىنە قاراعاندا رەسەي جاقتىڭ سول ەلدە تۇراتىن اقش ديپلوماتيالىق قىزمەتكەرلەرىنىڭ سانىن قىسقارتۋ شەشىمى ەكى ەل اراسىنداعى اسكەري ىستەرگە ەشقانداي اسەر ەتپەيدى. بۇل تۋرالى «شينحۋا» رەسەيلىك «سپۋتنيك»-كە سىلتەمە جاساي وتىرىپ حابارلايدى.

پەنتاگوندا وتكەن ارنايى ءباسپاسوز ءماسليحاتىندا دەۆيس: «شىنىن ايتايىن، مەن رەسەيدىڭ كىمدەردى قىسقارتىپ، كىمدەردى ءوز تەرريتورياسىندا قالدىرادى،  اراسىندا اسكەري قىزمەتكەرلەر بار ما، جوق پا، مۇنى بىلمەيمىن.  بىراق ءبىز الداعى ۋاقىتتا ناقتىلاي انىقتايتىن بولامىز. بىراق بۇل ەكى ەلدىڭ اسكەري ءىس-قيمىلىنا اسەر ەتپەيتىنى انىق»، – دەپ جاۋاپ بەردى.

ول سونىمەن قاتار، ەكى ەل اسكەري بايلانىس پەن سەنىم ارقاسىندا ءسۇريادا سوعىستى بولدىرماۋ ءۇشىن قىزمەت ەتىپ تۇرعانىن ەسكە سالا كەتتى. «ءبىز ۇنەمى ەكى ەل بايلانىسىنا كەرى اسەر ەتەتىندەي ديپلوماتتاردى قىسقارتپاي كەلدىك »، – دەپ قوستى پەنتاگون وكىلى. الايدا، وباما تاقتان كەتەر الدىندا رەسەيدىڭ اقش-تاعى نەگىزگى ديپلوماتتارى ەلدەن قۋىلعان بولاتىن.

ەستەرىڭىزگە سالا كەتەيىك، اقش رەسەيگە قاراتقان جاڭا سانكتسيا جوباسىن ورتاعا قويعاننان كەيىن، ماسكەۋ بۇعان جاۋاپ رەتىندە اقش-تىڭ 755 ديپلوماتيالىق جانە تەحنيكالىق قىزمەتكەرىن رەسەي تەرريتورياسىنان شىعارىپ سالاتىندارىن جەتكىزگەن بولاتىن.

“The Qazaq Times”