فوتو: Kapital.kz

2016 جىلى ءبىلىم بەرۋ ۇيىمدارىنىڭ كىرىسى 1,7 ترلن تەڭگەدەن اسقان. 2015 جىلدىڭ سايكەس كەزەڭىمەن سالىستىرعاندا (1,4 ترلن تەڭگە) كورسەتكىش 21,4%-عا جوعارى.

ستاتيسيتكا كوميتەتىنىڭ مالىمەتىنشە، نەگىزگى جانە ورتا ءبىلىم بەرۋ قىزمەتىنىڭ ۇلەسى جالپى كىرىستىڭ 49,3 پايىزىن قۇرادى. جوعارعى ءبىلىم بەرۋ ورىندارىنىكى 18,1 پايىز، مەكتەپكە دەيىنگى ءبىلىم بەرۋ ورىندارىنىڭ ۇلەسى - 12,5 پايىز.

دەگەنمەن بۇل ۇيىمداردىڭ شىعىنى كىرىسپەن بىردەي. 2016 جىلى شىعىن 1,7 ترلن تەڭگە بولعان. شىعىننىڭ كوپشىلىگى، شامامەن 1,1 ترلن تەڭگە (67,1 پايىز) جۇمىس كۇشىنە جۇمسالعان. قىزمەت كورسەتۋگە كەتكەن شىعىن 215,6 ملرد تەڭگەنى (12,7 پايىز), باسقا شىعىندار 176,3 ملرد تەڭگەنى (10,3 پايىز) قۇراعان.

ايتا كەتەيىك، وسى جىلدىڭ قاڭتار-ناۋرىز ايىندا قازاقستاننىڭ جوعارعى وقۋ ورىندارىنان تۇسكەن سالىق كولەمى 10,5 پايىزعا ارتقان. كوميتەتتىڭ مالىمەتىنە سەنسەك، 2017 جىلدىڭ ءبىرىنشى توقسانىندا قازاقستاندىق جوو-لار 5,1 ملرد تەڭگە سالىق تولەگەن. كورسەتكىش وتكەن جىلدىڭ سايكەس كەزەڭىنە قاراعاندا 486 ملن تەڭگەگە ارتىق.

“The Qazaq Times”